കോഴിക്കോട് : ആരോഗ്യപ്രവർത്തകർക്കിടയിൽ കോവിഡ് ക്രമാതീതമായി പടരുന്നു. കഴിഞ്ഞദിവസം 40 ഹൗസ് സർജൻമാരാണ് കോവിഡ് പോസിറ്റീവായത്. ആരോഗ്യപ്രവർത്തകരുടെ കുറവ് നികത്താത്തതിനാൽ കോവിഡ് രോഗലക്ഷണങ്ങളുമായി ജോലിചെയ്യേണ്ട അവസ്ഥയിലാണ് പലരും. രോഗം സ്ഥിരീകരിച്ച് ക്വാറന്റീനിൽ പോയാൽ പകരം ആളില്ലാത്തതാണ് പ്രശ്നം ഗുരുതരമാക്കിയിരിക്കുകയാണ്. മെഡിക്കൽ വിദ്യാർഥികളിൽ നൂറിലധികംപേർക്ക് കോവിഡ് രോഗലക്ഷണങ്ങളുണ്ടെങ്കിലും ടെസ്റ്റ് നടത്തിയിട്ടില്ല. ക്ളാസുകൾ നിർത്താത്തതിനാൽ എക്സാം, പോസ്റ്റിങ് തുടങ്ങിയവ നഷ്ടപ്പെടുമെന്ന ആശങ്കയിലാണ് ആരും ടെസ്റ്റ് നടത്താത്തത്. ക്ളാസ് നിർത്തണമെന്ന് അധികൃതരോട് ആവശ്യപ്പെട്ടെങ്കിലും നടപടിയൊന്നുമായില്ലെന്നും ഹോസ്റ്റലുകളിൽ കോവിഡ് വ്യാപകമായി കൂടുന്നുണ്ടെന്നും വിദ്യാർഥികൾ പറയുന്നു.
കോവിഡ് ആശുപത്രിയായ പി.എം.എസ്.എസ്.വൈ. ബ്ളോക്കിലെ പത്തിൽ ഒമ്പതുവാർഡുകളിലും ഐ.സി.യു.വിൽ 15 ഉം ട്രയാജിലും (അത്യാഹിതവിഭാഗം) കോവിഡ് രോഗികൾ നിറഞ്ഞിരിക്കുകയാണ്. വെള്ളിയാഴ്ച 62 ആരോഗ്യപ്രവർത്തകർക്കുകൂടി കോവിഡ് പോസിറ്റീവായതോടെ ഡോക്ടർമാരടക്കം 250 ഓളം ആരോഗ്യപ്രവർത്തർക്കാണ് രോഗം സ്ഥിരീകരിച്ചത്. അതേസമയം എം.സി.എച്ചിൽ കോവിഡിതര രോഗികളുടെ എണ്ണവും വർധിച്ചിരിക്കുകയാണ്. അതിനിടെ മെഡിക്കൽ കോളേജ് ആശുപത്രിയിൽ കോവിഡ് ബ്രിഗേഡ് മുഖേന ജോലിചെയ്തിരുന്ന ഡോക്ടർ, സ്റ്റാഫ് നഴ്സ്, ക്ളീനിങ് സ്റ്റാഫ്, ഡി.ഇ.ഒ. എന്നീ തസ്തികളിലേക്ക് ജീവനക്കാരെ രണ്ടുമാസത്തേക്ക് നിയമിക്കാൻ തീരുമാനിച്ചതായി ആശുപത്രി സൂപ്രണ്ട് ഡോ. എം.പി. ശ്രീജയൻ അറിയിച്ചു.
