എടക്കര > വാഹനം വാങ്ങി പണം നൽകാതെ മുങ്ങിയ കേസിൽ 32 വർഷം മുമ്പ്‌ ഒളിവിൽ പോയയാൾ പിടിയിൽ. കാസർകോട് ഉപ്പള സ്വദേശി ഇഖ്‌ബാലി (70)നെയാണ് എടക്കര പൊലീസ് അറസ്റ്റ്ചെയ്‌തത്. 1991ലാണ് സംഭവം. കേസ് രജിസ്റ്റർ ചെയ്‌ത് പ്രതി ജയിലിലായിരുന്നു. ജാമ്യത്തിലിറങ്ങിയ ശേഷമാണ്‌ ഒളിവിൽപോയത്‌.
പ്രതിയെ പിടികൂടാനാകാത്തതിൽ കോടതി വാറന്‍ഡ് പുറപ്പെടുവിച്ചു. എടക്കര ഇൻസ്പെക്‌ടർ എൻ ബി ഷൈജുവിന്റെ നേതൃത്വത്തിലുള്ള അന്വേഷണത്തിൽ പ്രതി കാസർകോട് ഉപ്പളയിലെ വാടകവീട്ടിൽ താമസിക്കുന്നതായി കണ്ടെത്തി. പൊലീസ് ഇയാളെ പിടികൂടി കോടതിയിൽ ഹാജരാക്കി. സീനിയർ സിപിഒ സി എ മുജീബ്, സാബിർ അലി, സിപിഒ സുബീഷ് കാരക്കുന്ന് എന്നിവർ അന്വേഷകസംഘത്തിലുണ്ടായി.
