തിരുവനന്തപുരം> കൊൽക്കത്തയിൽ ഡിവൈഎഫ്‌ഐ സംഘടിപ്പിച്ച ഇൻസാഫ്‌ റാലിയിലെ ജനപങ്കാളിത്തം ബംഗാളിലെ വൻ തിരിച്ചുവരവിന്റെ തെളിവാണെന്ന്‌ അഖിലേന്ത്യാ പ്രസിഡന്റ്‌ എ എ റഹീം എംപി. അതിന്റെ തുടർച്ചയായി, കേന്ദ്രസർക്കാരിന്റെ നയങ്ങൾക്കെതിരേ 20ന്‌ കേരളത്തിൽ സംഘടിപ്പിക്കുന്ന മനുഷ്യച്ചങ്ങലയും ചരിത്രമായി മാറുമെന്നും അദ്ദേഹം വാർത്താസമ്മേളനത്തിൽ പറഞ്ഞു.
2008 നവംബറിൽ ഡിവൈഎഫ്‌ഐ പശ്‌ചിമബംഗാൾ സംസ്ഥാന സമ്മേളനത്തോടനുബന്ധിച്ചാണ്‌ ബ്രിഗേഡ്‌ മൈതാനി നിറച്ചുകൊണ്ട്‌ സമ്മേളനം സംഘടിപ്പിച്ചത്‌. 15 വർഷത്തിനുശേഷം വീണ്ടും മൈതാനംനിറച്ച്‌ സമരം നടത്താനായത്‌ സംഘടനയുടെ വൻതിരിച്ചുവരവാണ്‌ തെളിയിക്കുന്നത്‌. തൃണമൂൽ സർക്കാർ അധികാരത്തിലേറിയശേഷം നടത്തിയ ചെറുത്തുനിൽപ്പിന്റെയും ത്യാഗത്തിന്റേയും പോരാട്ടത്തിന്റേയും ഫലമാണ്‌ റാലിയുടെ വിജയം. അഴിമതി, തൊഴിലില്ലായ്‌മ, വർഗീയത എന്നിവയ്‌ക്കെതിരായ റാലി കേന്ദ്രസർക്കാരിനും തൊഴിലില്ലായ്‌മയ്‌ക്കുമെതിരേ രാജ്യത്താകെ സംഘടിപ്പിക്കുന്ന പോരാട്ടങ്ങൾക്ക്‌ കരുത്തുപകരുമെന്നും അദ്ദേഹം പറഞ്ഞു.
തൊഴിലില്ലായ്‌മയ്‌ക്കും കേന്ദ്ര അവഗണനയ്‌ക്കുമെതിരേ ത്രിപുരയിലും തമിഴ്‌നാട്ടിൽ ലഹരിമാഫിയക്കെതിരേയും വലിയ പ്രക്ഷോഭങ്ങൾ സംഘടിപ്പിക്കാൻ ഡിവൈഎഫ്‌ഐയ്‌ക്ക്‌ കഴിഞ്ഞു. കേരളത്തിൽ നടത്തുന്ന മനുഷ്യച്ചങ്ങലയിലും ഈ ആവേശം പ്രതിഫലിക്കും. അതേസമയം തൊഴിലില്ലായ്‌മയും കേന്ദ്രസർക്കാരിന്റെ അവഗണനയ്‌ക്കും വർഗീയതയ്‌ക്കുമെതിരേ ഡിവൈഎഫ്‌ഐ രാജ്യത്താകമാനം പ്രക്ഷോഭം സംഘടിപ്പിക്കുമ്പോൾ കോൺഗ്രസിന്റെയും യൂത്ത്‌കോൺഗ്രസിന്റെയും നിലപാടുകൾ കൗതുകമുണർത്തുന്നു. പ്രത്യേകിച്ച്‌ കേരളത്തിലെ കോൺഗ്രസിനും യൂത്ത്‌ കോൺഗ്രസിനും ഈ കാര്യങ്ങളിൽ ഒരു താൽപര്യവുമില്ല. അവർക്ക്‌ വ്യാജരേഖ നിർമാണത്തിലും അയോധ്യ ക്ഷേത്രോദ്‌ഘാടനത്തിനുള്ള ആളെക്കൂട്ടുന്നതിലുമുള്ള തിരക്കിലാണ്‌. കോൺഗ്രസിന്റെ അസ്ഥിവാരം തോണ്ടുന്ന നടപടിയാണ്‌ അവർ ചെയ്‌തുകൊണ്ടിരിക്കുന്നതെന്നും എ എ റഹീം പറഞ്ഞു.
ജില്ലാ സെക്രട്ടറി ഡോ. ജെ ഷിജുഖാൻ, ജില്ലാപ്രസിഡന്റ്‌ വി അനൂപ്‌ എന്നിവരും വാർത്താ സമ്മേളനത്തിൽ പങ്കെടുത്തു.
