തിരുവനന്തപുരം: മാനന്തവാടിയിൽ മയക്കു വെടിവെച്ചു പിടികൂടിയ തണ്ണീർ കൊമ്പൻ ചരിഞ്ഞ സംഭവത്തിൽ പരിശോധനയ്ക്കായി വിദഗ്ധ സമിതിയെ നിയോഗിച്ചു. കാട്ടാനയുടെ മരണത്തിനിടയാക്കിയ സാഹചര്യം പരിശോധിക്കാനാണ് സമിതി. ഈസ്റ്റേൺ സർക്കിൾ സിസിഎഫ് കെ വിജയാനന്ദൻ ഐഎഫ്എസ് ആണ് സമിതി ചെയർമാൻ. സമിതിയിൽ അഞ്ച് അംഗങ്ങളുണ്ടാകും. ഒരു മാസത്തിനകം റിപ്പോർട്ട് നല്കണമെന്നാണ് സമിതിക്ക് സർക്കാർ നൽകിയിരിക്കുന്ന നിർദേശം.
തണ്ണീർ കൊമ്പൻ ചരിഞ്ഞത് ശരീരത്തിലെ അണുബാധയും തുടർന്നുണ്ടായ ഹൃദയാഘാതവും മൂലമാണെന്നാണ് വനം വകുപ്പ് പറയുന്നത്. ആനയുടെ പിൻഭാഗത്ത് ഉണ്ടായ മുറിവ് ഏകദേശം ഒരു മാസത്തോളം പഴക്കമുള്ളതാണെന്നും ഈ മുറിവിലെ അണുബാധയാണ് കാരണം എന്നും ചീഫ് വെറ്റിനറി സർജൻ ഡോക്ടർ അജേഷ് മോഹൻദാസ് വ്യക്തമാക്കി.
പൂർണ്ണ ആരോഗ്യവാനാണെന്ന് വനം വകുപ്പ് പറഞ്ഞ തണ്ണീർ കൊമ്പൻ ഇന്ന് രാവിലെയാണ് ചരിഞ്ഞത്. ബന്ദിപ്പൂർ ഫോറസ്റ്റ് ഡിവിഷനിലെ രാമപുര ബേസ് ക്യാമ്പിൽ രാവിലെ പത്തരയോടെ ആരംഭിച്ച പോസ്റ്റ്മോർട്ടം നാലു മണിക്കൂറിലേറെ നീണ്ടു. പിൻഭാഗത്തുണ്ടായ വലിയ മുഴയിലെ അണുബാധ ആനയുടെ ആരോഗ്യനിലയെ ഗുരുതരമായി ബാധിച്ചു. ശ്വാസകോശത്തിലെ അണുബാധയും ശരീരത്തിലെ മറ്റു മുറിവുകളും ഹൃദയാഘാതത്തിന് കാരണമായി. ഇതാണ് ആന ചരിയാൻ കാരണമെന്ന് പോസ്റ്റ്മോർട്ടത്തിൽ വ്യക്തമായതായി വെറ്റിനറി സർജൻ ഡോക്ടർ അജേഷ് മോഹൻദാസ് പറഞ്ഞു.
കർണാടക വനം വകുപ്പിന്റെ ചീഫ് വെറ്റിനറി സർജൻ ഡോക്ടർ വസീം മിർജയുടെ നേതൃത്വത്തിലുള്ള മെഡിക്കൽ സംഘമായിരുന്നു പോസ്റ്റ്‌ മോർട്ടം നടപടികൾക്ക് നേതൃത്വം നൽകിയത്. കേരളത്തിൽ നിന്നുള്ള വനം വകുപ്പിന്റെ അഞ്ചംഗ വിദഗ്ധ സംഘത്തിന്റെയും കർണാടകയുടെ ഉന്നത വനം വകുപ്പ് ഉദ്യോഗസ്ഥരുടെയും സാന്നിധ്യത്തിൽ ആയിരുന്നു പോസ്റ്റ്മോർട്ടം പൂർത്തിയായത്.
