പത്തനംതിട്ട: കടമ്മനിട്ട രാമകൃഷ്ണ്‌ണൻ ഫൗണ്ടേഷൻ ഏർപ്പെടുത്തിയ ഈ വർഷത്തെ കടമ്മനിട്ട രാമകൃഷ്ണൻ പുരസ്കാരത്തിന് കവിയും ഗാനരചയിതാവുമായ റഫീഖ് അഹമ്മദ് അർഹനായി. കവിതയിലെ സമഗ്രസംഭാവനക്കാണ് അവാർഡ്. 55,555 രൂപയും പ്രശസ്തിപത്രവും ശിൽപവും അടങ്ങുന്നതാണ് പുരസ്കാരം.
കടമ്മനിട്ട രാമകൃഷ്ണൻ ഫൗണ്ടേഷന്റെ സെക്രട്ടറിയായിരുന്ന എം.ആർ. ഗോപിനാഥന്‍റെ സ്‌മരണാർഥം യുവകവികൾക്ക് ഏർപ്പെടുത്തിയ ആർ. ഗോപിനാഥൻ അവാർഡിന് വിജു കടമ്മനിട്ടയെ തെരഞ്ഞെടുത്തു.
മാർച്ച് 31ന് കടമ്മനിട്ട സ്മൃതിമണ്ഡപത്തിൽ നടക്കുന്ന അനുസ്മരണ സമ്മേളനത്തിൽ ഫൗണ്ടേഷൻ പ്രസിഡന്റ് മുൻ വിദ്യാഭ്യാസ-സാംസ്കാരിക മന്ത്രി എം.എ. ബേബി അവാർഡുകൾ സമർപ്പിക്കും. വാർത്തസമ്മേളനത്തിൽ ഫൗണ്ടേഷൻ ഭാരവാഹികളായ വി.കെ. പുരുഷോത്തമൻപിള്ള, ബാബു ജോൺ, ആർ. കലാധരൻ, ഡോ. എം.ആർ. ഗീതദേവി എന്നിവർ പങ്കെടുത്തു.
