കൊച്ചി > കേബിൾ കൈവരലിൽ കുരുങ്ങി പ്ലസ്ടു വിദ്യാർഥിയുടെ വിരൽ അറ്റു. മാമംഗലം വൈഎംജെ റോഡ് മഠത്തിൽപറമ്പിൽ മുഹമ്മദ് ഷാഫിയുടെ മകൻ അബു ഹസന്റെ (17) ഇടത് കൈയിലെ നടുവിരലാണ് അറ്റത്. വിരലിലെ മാംസം വേർപ്പെട്ട നിലയിലായിരുന്നു. കറുകപ്പിള്ളിയിൽ വാടകയ്ക്ക് താമസിക്കുകയായിരുന്ന അബു ഹസന്റെ കുടുംബം രണ്ടാഴ്ച മുമ്പാണ് മാംമംഗലത്തെ വൈഎംജെ റോഡിലുള്ള പുതിയ വീട്ടിലേക്ക് താമസം മാറിയത്.
വീട്ടുസാധനങ്ങൾ പുതിയ വീട്ടിലേയ്ക്ക് കൊണ്ടുപോകാൻ വെള്ളിയാഴ്ച സൈക്കിളിൽ കറുകപള്ളിയിലെ വീട്ടിലെത്തിയതായിരുന്നു അബു ഹസൻ. അച്ഛനോടൊപ്പം വീട്ടുസാധനങ്ങൾ കയറ്റിയശേഷം മടങ്ങവെ വീടിന് കുറുകെ താഴ്ന്നു കിടന്ന കേബിൾ സൈക്കിളിന്റെ ഹാൻഡിലിൽ ഉടക്കി. നടുവിരലിലെ മോതിരത്തിൽ കേബിൾ ഉടക്കി വലിഞ്ഞ് മാംസം വേർപെടുകയായിരുന്നു. ആശുപത്രിയിൽ എത്തിച്ച് പ്ലാസ്റ്റിക് സർജറിയിലൂടെ അറ്റ്പോയ ഭാഗം തുന്നിപ്പിടിപ്പിച്ചു
