വാഷിങ്ടൺ: വിവരം പുറത്തുപറയാതിരിക്കാൻ അശ്ലീല നടിക്ക് കൈക്കൂലി നൽകിയെന്ന കേസിൽ മുൻ യു.എസ് പ്രസിഡന്റ് ഡോണൾഡ് ട്രംപിന്റെ വിചാരണ നടക്കുന്ന കോടതിക്ക് മുന്നിൽ യുവാവ് തീകൊളുത്തി മരിച്ചു. മൻഹാട്ടൻ കോടതിക്കു മുന്നിലാണ് 37കാരനായ മാക്സ്വെൽ അസറല്ലോ തീകൊളുത്തിയത്.
ഗൂഢാലോചനയുണ്ടെന്ന ലഘുലേഖ വായുവിലെറിഞ്ഞ ശേഷമായിരുന്നു ശരീരത്തിൽ ദ്രാവകം ഒഴിച്ച് തീകൊളുത്തിയത്. അതിഗുരുതരാവസ്ഥയിൽ ആശുപത്രിയിലെത്തിച്ചെങ്കിലും പിന്നീട് മരിച്ചു. വാദം കേൾക്കുന്ന ജഡ്ജിമാരെ തിരഞ്ഞെടുക്കുന്ന പ്രക്രിയയാണ് കോടതിയിൽ പുരോഗമിക്കുന്നത്. ഈ സമയം ട്രംപ് കോടതിയിലുണ്ടായിരുന്നു. സംഭവം നടക്കുന്നതിനിടെ അദ്ദേഹം കോടതിയിൽനിന്ന് പുറത്തുപോയതായി റിപ്പോർട്ടുകൾ പറയുന്നു.
േഫ്ലാറിഡയിലെ വീട്ടിൽനിന്ന് കഴിഞ്ഞ ദിവസം ന്യൂയോർക്കിലെത്തിയ അസറല്ലോക്ക് ക്രിമിനൽ പശ്ചാത്തലമില്ലെന്ന് പൊലീസ് പറഞ്ഞു. വിചാരണ നടപടികൾ പുരോഗമിക്കുന്നതിനാൽ വൻ പൊലീസ് സന്നാഹം സ്ഥലത്തുണ്ടായിരുന്നു.
