വരന്തരപ്പിള്ളി : യുവതിയെ പീഡിപ്പിക്കാൻ ശ്രമിച്ച കേസിൽ വെള്ളിക്കുളങ്ങര നൂലുവള്ളി പട്ട്ളിക്കാടൻ സുജിത്ത് (35) പിടിയിൽ. നിരവധി ക്രിമിനൽ കേസുകളിൽ പ്രതിയായ സുജിത്തിനെ വരന്തരപ്പിള്ളി എസ്.എച്ച്.ഒ. എസ്. ജയകൃഷ്ണൻ, എസ്.ഐ. എ.വി. ലാലു എന്നിവരുടെ നേതൃത്വത്തിലാണ് അറസ്റ്റ് ചെയ്തത്. മൂന്ന് മാസം മുമ്പായിരുന്നു കേസിനാസ്പദമായ സംഭവം.
ബന്ധുവീട്ടിലെത്തിയ പ്രതി യുവതിയെ കടന്നുപിടിക്കുകയും പീഡിപ്പിക്കാൻ ശ്രമിക്കുകയുമായിരുന്നു എന്നാണ് കേസ്. ഒളിവിലായിരുന്ന സുജിത്ത് നൂലുവള്ളിയിൽ വരുന്നുണ്ടെന്ന വിവരത്തെത്തുടർന്ന് വരന്തരപ്പിള്ളി പോലീസ് നടത്തിയ പരിശോധനയിലാണ് പിടിയിലായത്.
നിരവധി അടിപിടി കേസുകളിൽ പ്രതിയായ സുജിത്ത് വെള്ളിക്കുളങ്ങര സ്റ്റേഷനിലെ റൗഡി ലിസ്റ്റിലുള്ളയാളാണ്. ഇവിടെ മാത്രം ഇയാളുടെ പേരിൽ പത്തിലേറെ കേസുകളുണ്ട്. വയനാട് മൂന്ന് കോടി രൂപയുടെ കുഴൽപ്പണം തട്ടിയ സംഭവത്തിൽ സുജിത് ഉൾപ്പെട്ടതായി സംശയിക്കുന്നതായും അന്വേഷണം നടന്നുവരുന്നതായും പോലീസ് പറഞ്ഞു. പ്രതിയെ വൈദ്യ പരിശോധനയ്ക്കുശേഷം കോടതിയിൽ ഹാജരാക്കും.
