തിരുവനന്തപുരം : ഗവർണറുടെ ഓഫിസിലെ പബ്ലിക്ക് റിലേഷൻ ഓഫിസർ എസ്.ഡി.പ്രിൻസിനെ ആ തസ്തികയിൽ പുനർ നിയമിക്കാൻ സർക്കാർ ഉത്തരവിറക്കി. കേരള യൂണിവേഴ്സിറ്റി ജീവനക്കാരനായിരുന്ന പ്രിൻസ് ഡെപ്യൂട്ടേഷനിൽ ഗവർണറുടെ പിആർഒ ആയി ജോലി ചെയ്യുകയായിരുന്നു. ഡെപ്യൂട്ടേഷൻ കാലാവധി 2020 മെയ് 31വരെ നീട്ടിയിരുന്നു. വിരമിച്ചശേഷം കരാർ അടിസ്ഥാനത്തിൽ ജോലി ചെയ്യുകയായിരുന്ന ഇദ്ദേഹത്തിന് പുനർനിയമനം നൽകണമെന്ന് ആവശ്യപ്പെട്ട് ഗവർണറുടെ പ്രിൻസിപ്പൽ സെക്രട്ടറി കത്തു നൽകിയിരുന്നു. ഇതിന്റെ അടിസ്ഥാനത്തിലാണ് പുനർനിയമനം നൽകിയത്.
ഗവർണരുടെ ഫോട്ടോഗ്രാഫറെ സ്ഥിരപ്പെടുത്താൻ കഴിഞ്ഞ ദിവസം മന്ത്രിസഭ തീരുമാനിച്ചിരുന്നു. വർഷങ്ങളായി രാജ്ഭവനിൽ കരാർ അടിസ്ഥാനത്തിൽ ജോലി നോക്കുന്നതിനാൽ ഫോട്ടോഗ്രാഫറെ സ്ഥിരപ്പെടുത്തണമെന്നായിരുന്നു ഗവർണറുടെ ഓഫിസിന്റെ ശുപാർശ. ഗവർണരുടെ ഓഫിസിൽ എത്തുന്ന അതിഥികളുടേയും ഗവർണർ പങ്കെടുക്കുന്ന ചടങ്ങുകളുടേയും ഫോട്ടോ രാജ്ഭവനു വേണ്ടി എടുക്കാനാണ് ഫോട്ടോഗ്രാഫറെ നിയമിച്ചിരിക്കുന്നത്.
