മോസ്കോ : റഷ്യ വ്യോമാക്രമണം ആരംഭിച്ചതിന് പിന്നാലെ യുക്രൈൻ രാജ്യത്ത് പട്ടാള നിയമം പ്രഖ്യാപിച്ചു. യുക്രൈനിലെ വിവിധ മേഖലകളിൽ റഷ്യ വ്യോമാക്രമണം നടത്തി. ബെൽഗോർഡ് പ്രവിശ്യയിലും കീവിലും കാർക്കിവിലും ക്രമറ്റോസ്കിലും വൻ സ്ഫോടനങ്ങൾ നടന്നു. റഷ്യൻ പോർവിമാനങ്ങൾ തുടർച്ചയായി മിസൈലുകൾ വർഷിക്കുകയാണ്. ഇതിനിടെ ഒരു റഷ്യൻ വിമാനം യുക്രൈൻ വെടിവെച്ചിട്ടതായി വാർത്താ ഏജൻസികൾ റിപ്പോർട്ട് ചെയ്തു. ഇതിന് പിന്നാലെ യുക്രൈൻ കീവ് വിമാനത്താവളം ഒഴിപ്പിക്കാൻ ആരംഭിച്ചു. റഷ്യ വ്യോമാക്രമണം ആരംഭിച്ചതിന് പിന്നാലെയാണ് കീവ് വിമാനത്താവളം ഒഴിപ്പിക്കാൻ യുക്രൈൻ സർക്കാർ നീക്കം തുടങ്ങിയത്. വിമാനത്താവളത്തിൽ നിന്ന് യാത്രക്കാരെയും ജീവനക്കാരെയും ഒഴിപ്പിക്കുകയാണ്.
ഇതിനിടെ റഷ്യൻ സൈന്യം ഒഡെസയിലും മറ്റ് പ്രദേശങ്ങളിലും അതിർത്തി കടന്ന് ഖാർക്കീവിൽ ഇറങ്ങിയതായി യുക്രൈനിയൻ ഉദ്യോഗസ്ഥൻ പറഞ്ഞു. റഷ്യൻ ആക്രമണം അവസാനിപ്പിക്കാൻ ഐക്യരാഷ്ട്ര സഭ ഇടപെടണമെന്നും യുക്രൈൻ ആവശ്യപ്പെട്ടു. ഡോൺബാസ്കിൽ സൈനിക നടപടിക്ക് പുതിൻ അനുമതി നൽകി മിനിറ്റുകൾക്കുളളിലാണ് റഷ്യ യുക്രൈനിൽ വ്യോമാക്രമണം നടന്നത്. ആക്രമണത്തെ പ്രതിരോധിക്കാൻ ശ്രമിക്കരുതെന്നാണ് യുക്രൈന് പുതിൻ നൽകിയിരിക്കുന്ന മുന്നറിയിപ്പ്. ആയുധംവെച്ച് കീഴടങ്ങാനാണ് യുക്രൈൻ സൈനികർക്ക് പുതിന്റെ താക്കീത്. എന്നാൽ ആക്രമണത്തെ ശക്തമായി പ്രതിരോധിക്കുമെന്നാണ് യുക്രൈൻ പ്രതികരിച്ചത്. ടാങ്കുകളും വലിയ ആയുധങ്ങളും വഹിക്കുന്നതിനു ഉപയോഗിക്കുന്ന സൈനികവാഹനങ്ങൾ ഉൾപ്പടെ യുക്രൈന് 40 കിലോമീറ്റർ ചുറ്റളവിൽ അണിനരന്നിട്ടുണ്ട്. രണ്ടര ലക്ഷത്തോളം റഷ്യൻ സൈനികരാണ് യുക്രൈനെ വളഞ്ഞിട്ടുള്ളത്.
