റാന്നി : തിരുവനന്തപുരത്തു നിന്നും ചെന്നൈക്ക് പോകുവാനെത്തിയ കുടുംബം സഞ്ചരിച്ചിരുന്ന കാർ ഓട്ടത്തിനിടയില് തീപിടിച്ചു പൂര്ണ്ണമായും കത്തി. സംഭവത്തില് ആര്ക്കും പരിക്കേറ്റിട്ടില്ല. തിരുവനന്തപുരം സ്വദേശികളായ പ്രണോബ് ജയപ്രകാശ്, ഭാര്യ പ്രീതി നായർ, ഇവരുടെ ഒരു വയസുള്ള കുട്ടി എന്നിവര് സഞ്ചരിച്ച കാറാണ് തീപിടിച്ചത്. കഴിഞ്ഞ രാത്രി 1.30 ഓടെ പുനലൂര്-മൂവാറ്റുപുഴ സംസ്ഥാന പാതയിലെ പൊന്തന്പുഴ വനത്തിനുള്ളില് ആണ് സംഭവം. പ്ലാച്ചേരിയിൽ നിന്നും പൊന്തൻപുഴയിലേക്ക് വരുന്ന വഴി കാറിന്റെ ബോണറ്റിൽ നിന്നു പുക ഉയരുന്നത് കണ്ട് പ്രണോബ് കാർ നിർത്തി പുറത്ത് ഇറങ്ങിയ ശേഷമായിരുന്നു അപകടം. അതിനാല് വന് ദുരന്തമാണ് ഒഴിവായത്. തീ പൂര്ണ്ണമായും പിടിക്കുന്നതിനു മുമ്പ് ഇവരുടെ അത്യാവശ്യ സാധനങ്ങളും കാറിൽ നിന്നു മാറ്റിയിരുന്നു. മണിമല പോലീസ് സ്ഥലത്തെത്തി മേല്നടപടികള് സ്വീകരിച്ചു. സ്ഥലത്ത് ഫോറന്സിക് വിഭാഗം എത്തി പരിശോധന നടത്തി തെളിവുകള് ശേഖരിച്ചു വരുന്നു.
