ബെർലിൻ : ഇന്ത്യയുടെ യുവതാരം ലക്ഷ്യ സെൻ ജർമൻ ഓപ്പൺ ബാഡ്മിന്റൺ ടൂർണമെന്റിന്റെ സെമിയിൽ. ക്വാർട്ടർ ഫൈനലിൽ ഇന്ത്യയുടെ തന്നെ എച്ച്.എസ്.പ്രണോയിയെ തകർത്താണ് സെൻ സെമിയിലിടം നേടിയത്. നേരിട്ടുള്ള ഗെയിമുകൾക്കാണ് സെന്നിന്റെ വിജയം. സ്കോർ: 21-15, 21-16. മത്സരം വെറും 39 മിനിറ്റ് മാത്രമാണ് നീണ്ടുനിന്നത്. സെമിയിൽ ഒന്നാം സീഡായ ഡെന്മാർക്കിന്റെ വിക്ടർ അക്സൽസെനാണ് ലക്ഷ്യ സെന്നിന്റെ എതിരാളി.
അതേ സമയം മറ്റൊരു ക്വാർട്ടറിൽ ഇന്ത്യയുടെ കിരീടപ്രതീക്ഷയായിരുന്ന കിഡംബി ശ്രീകാന്ത് പുറത്തായി. അക്സൽസെനാണ് ശ്രീകാന്തിനെ തകർത്തത്. നേരിട്ടുള്ള ഗെയിമുകൾക്കാണ് ശ്രീകാന്തിന്റെ തോൽവി. സ്കോർ: 21-10, 23-21.ഇതോടെ പുരുഷ വിഭാഗം സെമി ഫൈനൽ ലൈനപ്പായി. ആദ്യ സെമിയിൽ ലക്ഷ്യ സെന്നും അക്സൽസെനും കൊമ്പുകോർക്കുമ്പോൾ രണ്ടാം സെമിയിൽ ലീ സീ ജിയ കുൻലാവുട്ട് വിറ്റിഡ്സാണിനെ നേരിടും.
