ദില്ലി: നിരത്തിലിറക്കി മണിക്കൂറുകൾക്കുള്ളിൽ ദില്ലിയിലെ ഇലക്ട്രിക് ബസ്സുകളിലൊന്ന് പാതി വഴിയിൽ തകരാറിലായി. രോഹിണി ഡിപ്പോയ്ക്ക് സമീപമാണ് വാഹനം തകരാറിലായത്. മുഖ്യമന്ത്രി അരവിന്ദ് കെജ്രിവാൾ150 പുതിയ ഇലക്ട്രിക് ബസുകൾ ഫ്ലാഗ് ഓഫ് ചെയ്തതിന് പിന്നാലെയാണ് സംഭവം. ചൊവ്വാഴ്ചയാണ് മുഖ്യമന്ത്രി ഇലക്ട്രിക് ബസുകൾ ഉദ്ഘാടനം ചെയ്തത്. ചൊവ്വാഴ്ച മുതൽ ഈ ബസുകളിൽ യാത്രക്കാർക്ക് മൂന്ന് ദിവസത്തെ സൗജന്യ യാത്രയും കെജ്രിവാൾ പ്രഖ്യാപിച്ചിരുന്നു.
വാഹനത്തിന്റെ താപനില നിശ്ചിത പരിധിക്കപ്പുറം ഉയർന്നതിനെ തുടർന്നാണ് ബസ് തകരാറിലായതെന്ന് ഡിടിസി (ദില്ലി ട്രാൻസ്പോർട്ട് കോർപ്പറേഷൻ) പറഞ്ഞു. പരിശോധനയ്ക്ക ശേഷം രണ്ട് മണിക്കൂറിനുള്ളിൽ വീണ്ടും റോഡിലിറക്കിയതായും ഡിടിസി വ്യക്തമാക്കി.രോഹിണി ഡിപ്പോ സെക്ടർ 37-ൽ നിന്നുള്ള ഡിഎൽ 516 ജി ഡി 2610 നമ്പർ ബസാണ് ലോഞ്ച് ദിവസം വൈകിട്ട് നാലോടെ തകരാറിലായത്.
“ഇലക്ട്രിക് ബസ് നമ്പർ 2610-ൽ നിർദ്ദിഷ്ട/രൂപകൽപ്പന ചെയ്ത പരിധിക്കപ്പുറം താപനില വർദ്ധിച്ചതിന്റെ സൂചനയുണ്ടായിരുന്നു, അതിനാൽ ഇൻബിൽറ്റ് സുരക്ഷാ ഫീച്ചർ കാരണം വാഹനം ഓട്ടോമാറ്റിക്കായി നിന്നു. പ്രതികരണ സംഘം ഉടൻ എത്തി, ബസിൽ അറ്റൻഡ് ചെയ്യുകയും രണ്ട് മണിക്കൂറിനുള്ളിൽ റോഡിലിറക്കുകയും ചെയ്തു”, ഡിടിസി ട്വീറ്റ് ചെയ്തു.
