ആഷസ് ടെസ്റ്റിന്റെ രണ്ടാം ഇന്നിംഗ്സില് ഇംഗ്ലണ്ടിനു ബാറ്റിംഗ് തകര്ച്ച. രണ്ടാം ദിനം അവസാനിക്കുമ്പോള് ഇംഗ്ലണ്ട് നാല് വിക്കറ്റ് നഷ്ടത്തില് 31 റണ്സ് എന്ന നിലയിലാണ്. സ്കോട്ട് ബോളണ്ട്, മിച്ചല് സ്റ്റാര്ക്ക് എന്നിവര് രണ്ട് വിക്കറ്റ് വീതം വീഴ്ത്തി. ഹസീബ് ഹമീദ്, സാക് ക്രോളി, ഡേവിഡ് മലാന്, ജാക്ക് ലീച്ച് എന്നിവരാണ് പുറത്തായത്. ഇന്നിംഗ്സ് തോല്വി ഒഴിവാക്കാന് ഇംഗ്ലണ്ടിന് ഇനിയും 51 റണ്സ് കൂടി നേടണം. 7 റണ്സ് എടുക്കുന്നതിനിടെ തന്നെ ഇംഗ്ലണ്ടിന് 2 വിക്കറ്റ് നഷ്ടമായിക്കഴിഞ്ഞിരുന്നു. തുടരെയുള്ള പന്തുകളില് സാക്ക് ക്രൗളിയെയും (5) ഡേവിഡ് മലനെയും (0) പുറത്താക്കിയ സ്റ്റാര്ക്ക് ഇംഗ്ലണ്ടിനെ തുടക്കത്തില് തന്നെ ബാക്ക്ഫൂട്ടിലാക്കി.
മൂന്നാം വിക്കറ്റില് ഹസീബ് ഹമീദ്-ജോ റൂട്ട് സഖ്യം രക്ഷാപ്രവര്ത്തനത്തിനു ശ്രമിച്ചെങ്കിലും സ്കോട്ട് ബോളണ്ടിന്റെ ഒരു ഓവര് വീണ്ടും ഇംഗ്ലണ്ടിനു തിരിച്ചടിയായി. മൂന്നാം പന്തില് ഹമീദിനെയും (7) അഞ്ചാം പന്തില് നൈറ്റ് വാച്ച്മാന് ജാക്ക് ലീച്ചിനെയും (0) പുറത്താക്കിയ ബോളണ്ട് ഇംഗ്ലണ്ടിനെ തകര്ച്ചയിലേക്ക് തള്ളിവിട്ടു. നിലവില് ജോ റൂട്ട് (12), ബെന് സ്റ്റോക്സ് (12) എന്നിവരാണ് ക്രീസില്.
