ലക്നൗ : സമാജ്‌വാദി പാർട്ടി നേതാവും ഉത്തർപ്രദേശ് മുൻ മുഖ്യമന്ത്രിയുമായ മുലായം സിങ് യാദവിന്റെ ഭാര്യ സാധ്ന ഗുപ്ത (60) അന്തരിച്ചു. ശ്വാസകോശ അണുബാധയെത്തുടർന്നു ഗുരുഗ്രാമിലെ മേദാന്ത ആശുപത്രിയിൽ നാലു ദിവസമായി ചികിത്സയിലായിരുന്നു. മൃതദേഹം വൈകിട്ടോടെ ലക്നൗവിൽ എത്തിക്കും.
മുലായത്തിന്റെ രണ്ടാം ഭാര്യയാണ് സാധ്ന. ആദ്യ ഭാര്യയും അഖിലേഷ് യാദവിന്റെ അമ്മയുമായ മാൽതി യാദവ് മരിച്ച ശേഷം 2003ലാണ് സാധ്‌നയെ മുലായം വിവാഹം ചെയ്തത്. പ്രതീക് യാദവ് മകനും അപർണ യാദവ് മരുമകളുമാണ്. ഉത്തർപ്രദേശ് ഉപമുഖ്യമന്ത്രി കേശവ് പ്രസാദ് മൗര്യ, ഹരിയാന മുഖ്യമന്ത്രി മനോഹർ ലാൽ ഖട്ടർ തുടങ്ങിയവർ സാധ്ന‌യുടെ നിര്യാണത്തിൽ അനുശോചിച്ച് ട്വിറ്ററിൽ കുറിപ്പുകൾ പങ്കുവച്ചു.
