തിരുവനന്തപുരം: പൂജപ്പുര സെൻട്രൽ ജയിലിൽനിന്ന് രക്ഷപ്പെടാനുള്ള ശ്രമത്തിനിടെ മരത്തിൽ കയറി ആത്മഹത്യാ ഭീഷണി മുഴക്കിയ കൊലക്കേസ് പ്രതി ഒടുവിൽ ‘വലയിൽ’. പൊലീസ് ഉദ്യോഗസ്ഥരുടെ അനുനയ ശ്രമങ്ങൾക്കൊടുവിൽ ഇയാൾ താഴേക്ക് ചാടുകയായിരുന്നു. മരത്തിനു ചുവട്ടിൽ അഗ്നിശമന സേനാംഗങ്ങൾ വിരിച്ച വലയിലേക്കാണ് ഇയാൾ വീണത്. തുടർന്ന് കസ്റ്റഡിയിലെടുത്ത ഇയാളെ ആംബുലൻസിൽ ആശുപത്രിയിലേക്കു മാറ്റി.
ജീവപര്യന്തം തടവുകാരനായ കൊലക്കേസ് പ്രതി കോട്ടയം സ്വദേശി സുഭാഷാണ് ജയിൽ വളപ്പിലെ ചുറ്റു മതിൽ ചാടി തൊട്ടടുത്തുള്ള വളപ്പിലെ മരത്തിനു മുകളിൽ കയറിയത്. ജയിൽ ഓഫിസിൽ ഹാജരാക്കിയശേഷം പുറത്തിറങ്ങിയപ്പോഴാണ് ഉദ്യോഗസ്ഥരെ വെട്ടിച്ച് ഇയാൾ ഓടിയത്. മതിൽ ചാടി തൊട്ടടുത്തുള്ള സാമൂഹിക സുരക്ഷാ മിഷന്റെ ഷെൽട്ടർഹോം വളപ്പിലെ മരത്തിൽ കയറുകയായിരുന്നു.
ഉദ്യോഗസ്ഥർ അനുനയിപ്പിച്ച് താഴെയിറക്കാൻ ശ്രമിച്ചെങ്കിലും വിജയിച്ചില്ല. കുടുംബത്തെ കാണണമെന്നായിരുന്നു ആവശ്യം. അപകടം ഉണ്ടാകാതിരിക്കാൻ ഫയർഫോഴ്സ് മരത്തിനു ചുറ്റും വലവിരിച്ചു. ഒടുവിൽ ഇയാൾ താഴേക്കു ചാടുകയായിരുന്നു.
നെട്ടുകാൽത്തേരി ജയിലിലായിരുന്ന ഇയാളെ കുറച്ചു നാൾ മുൻപാണ് സെൻട്രൽ ജയിലിലേക്കെത്തിച്ചത്. ജയില്‍ മോചിതനാകണമെന്നതായിരുന്നു ഇയാളുടെ പ്രധാന ആവശ്യമെന്ന് ഉദ്യോഗസ്ഥർ പറഞ്ഞു. ജഡ്ജിയെ നേരിൽ കാണണമെന്നും ഇയാൾ ആവശ്യപ്പെട്ടതായി ഉദ്യോഗസ്ഥർ പറഞ്ഞു. ചെറിയ മരമാണെങ്കിലും ഉയരമുള്ളതിനാൽ ഉദ്യോഗസ്ഥർ ഏറെ നേരം അനുനയിപ്പിച്ച് താഴെയിറക്കാൻ ശ്രമിച്ചു. ഇടയ്ക്ക് മഴ പെയ്തത് രക്ഷാപ്രവർത്തനത്തിനു തടസമായി.
