മലയാളത്തില് ഏറ്റവും വിജയ ചരിത്രമുള്ള സിനിമ നിര്മാണക്കമ്പനിയില് ഒന്നാണ് ആശിര്വാദ് സിനിമാസ്. മോഹൻലാലും ആന്റണി പെരുമ്പാവൂരും ചേര്ന്നുള്ള കൂട്ടായ്മയില് ‘നരസിംഹം’ തൊട്ടിങ്ങോട്ട് ഒട്ടനവധി മെഗാ ഹിറ്റുകളാണ് മലയാളിക്ക് ആശിര്വാദ് സിനിമാസ് സമ്മാനിച്ചിരിക്കുന്നത്. ഇപ്പോഴിതാ ദുബായിയിലും ആശിര്വാദ് സിനിമാസിന്റെ ഓഫീസ് തുറന്നിരിക്കുകയാണ്. കഴിഞ്ഞ ദിവസം ദുബായ്യിലെ ഓഫീസ് ഉദ്ഘാടനം ചെയ്തതിന്റെ വീഡിയോ മോഹൻലാല് സാമൂഹ്യമാധ്യമത്തിലൂടെ പങ്കുവെച്ചിരിക്കുകയാണ്.
ദുബായ്യില് എത്തിയപ്പോള് ഒരു പാൻ ഇന്ത്യൻ ചിത്രത്തില് അഭിനയിക്കുന്നതിനും മോഹൻലാല് ഒപ്പുവെച്ചിരുന്നു. ‘വൃഷഭ’ എന്ന ചിത്രത്തിലാണ് മോഹൻലാല് നായകനാകുന്നത്. നന്ദ കിഷോറാണ് സംവിധാനം. ഇക്കാര്യം മോഹൻലാല് തന്നെയാണ് അറിയിച്ചത്.
മോഹൻലാലിന്റതായി ഇനി പ്രദര്ശനത്തിന് എത്താനുള്ള ചിത്രം ‘മോണ്സ്റ്റര്’ ആണ്. മോഹൻലാല് ആരാധകര് ആകാംക്ഷയോടെ കാത്തിരിക്കുന്ന ചിത്രമാണ് ‘മോണ്സ്റ്റര്.’ പുലിമുരുകനു ശേഷം മോഹൻലാലിനെ നായനാക്കി വൈശാഖ് സംവിധാനം ചെയ്യുന്നുവെന്നതു തന്നെയാണ് ഏറ്റവും വലിയ ആകര്ഷണം. ‘പുലിമുരുകന്റെ’ രചയിതാവ് ഉദയ് കൃഷ്ണ തന്നെയാണ് മോണ്സ്റ്ററിന്റെ തിരക്കഥാകൃത്തും.
പൂജ ഹോളിഡേയ്ക്ക് ചിത്രം എത്തിയേക്കുമെന്നാണ് റിപ്പോര്ട്ടുകള്. സെപ്റ്റംബര് 30ന് ചിത്രം റിലീസ് ചെയ്തേക്കുമെന്ന് പ്രമുഖ ട്രേഡ് അനലിസ്റ്റ് ശ്രീധര് പിള്ള ട്വീറ്റ് ചെയ്യുന്നു. ഛായാഗ്രഹണം സതീഷ് കുറുപ്പ്. എഡിറ്റിംഗ് ഷമീര് മുഹമ്മദ്, സംഗീതം ദീപക് ദേവ്, പ്രൊഡക്ഷന് കണ്ട്രോളര് സിദ്ധു പനയ്ക്കല്, സംഘട്ടനം സ്റ്റണ്ട് സില്വ, വസ്ത്രാലങ്കാരം സുജിത്ത് സുധാകരന്, സ്റ്റില്സ് ബെന്നറ്റ് എം വര്ഗീസ്, പ്രൊമോ സ്റ്റില്സ് അനീഷ് ഉപാസന, പബ്ലിസിറ്റി ഡിസൈന്സ് ആനന്ദ് രാജേന്ദ്രന് തുടങ്ങിയവരാണ് അണിയറയില്.
ജീത്തു ജോസഫിന്റെ ചിത്രമായ ‘റാമി’ല് ആണ് മോഹൻലാല് ഇപ്പോള് അഭിനയിക്കുന്നത്. മൂന്ന് വര്ഷത്തിന് ശേഷം ചിത്രം തുടങ്ങുന്നുവെന്ന് ജീത്തു ജോസഫ് തന്നെയാണ് അടുത്തിടെ അറിയിച്ചത്. എല്ലാവരുടെയും പ്രാര്ഥനയും പിന്തുണയും വേണമെന്നും ജീത്തു ജോസഫ് സാമൂഹ്യമാധ്യമത്തിലൂടെ അഭ്യര്ഥിച്ചിരുന്നുന്നു. തൃഷയാണ് ‘റാം’ എന്ന ചിത്രത്തില് നായികയായി എത്തുന്നത്.
ജീത്തു ജോസഫും മോഹൻലാലും ഏറ്റവും ഒടുവില് ഒന്നിച്ച ‘ട്വല്ത്ത് മാൻ’ വലിയ രീതിയില് പ്രേക്ഷക പ്രീതി നേടിയിരുന്നു. കൃഷ്ണകുമാറിന്റെ തിരക്കഥയിലാണ് ജീത്തു ജോസഫ് ‘ട്വല്ത്ത് മാൻ’ സംവിധാനം ചെയ്തത്. ഒരു മിസ്റ്ററി ത്രില്ലര് ചിത്രമായിരുന്നു ‘ട്വല്ത്ത് മാൻ’. ഡയറക്ട് ഒടിടി റിലീസ് ആയിരുന്ന ചിത്രത്തിന് മികച്ച പ്രതികരണമാണ് ലഭിച്ചിരുന്നത്.
അനുശ്രീ, അദിതി രവി, സൈജു കുറുപ്പ്, വീണ നന്ദകുമാര്, ശിവദ നായര്, ഉണ്ണി മുകുന്ദൻ തുടങ്ങി ഒട്ടേറെ താരങ്ങള് ചിത്രത്തിലുണ്ടായിരുന്നു. സതീഷ് കുറുപ്പ് ആണ് ചിത്രത്തിന്റെ ഛായാഗ്രാഹണം നിര്വഹിച്ചത്. രാജീവ് കോവിലകം ആയിരുന്നു ചിത്രത്തിന്റെ കലാസംവിധായകൻ. ലിന്റ ജീത്തു ആയിരുന്നു ചിത്രത്തിന്റെ കോസ്റ്റ്യൂം ഡിസൈനര്.
മോഹന്ലാല് ആദ്യമായി സംവിധാനം ചെയ്യുന്ന ‘ബറോസ്’ അടുത്തിടെ ചിത്രീകരണം പൂര്ത്തിയാക്കിയിരുന്നു. ആശിർവാദ് സിനിമാസാണ് ‘ബറോസ്’ നിർമ്മിക്കുന്നത്. ഇന്ത്യയിലെ ആദ്യ ത്രീഡി ചിത്രമായിരുന്ന ‘മൈ ഡിയര് കുട്ടിച്ചാത്തന്’ സംവിധാനം ചെയ്ത ജിജോയുടെ കഥയെ ആസ്പദമാക്കിയാണ് മോഹന്ലാല് സിനിമയൊരുക്കുന്നത്. ‘ബറോസ്’ എന്ന ചിത്രത്തിന്റെ ലൊക്കേഷനില് നിന്നുള്ള ഫോട്ടോകള് മോഹന്ലാല് തന്നെ പങ്കുവെച്ചിരുന്നു.
