മലപ്പുറം: നിലമ്പൂര്‍ ഗവ:മാനവേദന്‍ സ്‌കൂളില്‍ കുട്ടികള്‍ തമ്മില്‍ കൂട്ടത്തല്ല് . ഓണാഘോഷവുമായുണ്ടായ സംഘര്‍ഷത്തില്‍ വിദ്യാര്‍ഥികള്‍ക്ക് പരുക്കേറ്റു. സംഭവത്തില്‍ കേസെടുക്കുമെന്ന് പൊലീസ് അറിയിച്ചു.പ്ലസ് വണ്‍, പ്ലസ് ടു വിദ്യാര്‍ഥികള്‍ തമ്മില്‍ ചേരിതിരിഞ്ഞ് ഏറ്റുമുട്ടുകയായിരുന്നു. പ്ലസ് വണ്‍ വിദ്യാര്‍ഥികള്‍ മുണ്ടുടുത്ത് എത്തിയത് പ്ലസ് ടു വിദ്യാര്‍ഥികള്‍ ചോദ്യം ചെയ്തു . ഇതേ തുടര്‍ന്നുണ്ടായ വാക്കേറ്റമാണ് അടിപിടിയില്‍ കലാശിച്ചത്. ആദ്യം സ്‌കൂള്‍ കോമ്പൗണ്ടിലും പിന്നീട് പുറത്തും അടി നടന്നു. റോഡില്‍ സംഘര്‍ഷം തുടര്‍ന്നതോടെ പൊലീസ് എത്തിയാണ് ഇരു വിഭാഗത്തെയും പിരിച്ചുവിട്ടത്.പൊലീസ് ലാത്തി വീശിയതിനു ശേഷമാണ് കുട്ടികള്‍ പിരിഞ്ഞുപോയത്. പരിക്കേറ്റവരില്‍ ഒരു കുട്ടിയുടെ എല്ല് പൊട്ടിയിട്ടുണ്ട്. പരിക്ക് പറ്റിയ കുട്ടികളുടെ മൊഴി എടുത്തതിനുശേഷം കേസെടുക്കുമെന്ന് നിലമ്പൂര്‍ പൊലീസ് അറിയിച്ചു.
