മുംബൈ : ‘ദേവോം കെ ദേവ് മഹാദേവ്’ എന്ന ഹിന്ദി ടെലിവിഷന്‍ സീരിയലില്‍ ശിവനായി വന്ന് പ്രേക്ഷക മനസില്‍ ഇടം നേടിയ താരമാണ് മോഹിത് റെയ്ന. ‘ഉറി’ എന്ന ബോളിവുഡ് ചിത്രത്തിലെ മേജര്‍ കരണ്‍ കശ്യപ് എന്ന കഥാപാത്രത്തിലൂടെയും റെയ്ന ശ്രദ്ധയാകര്‍ഷിച്ചിരുന്നു. എന്നാല്‍ ഇപ്പോള്‍ താരത്തിന്റെ രഹസ്യവിവാഹ വാര്‍ത്തയാണ് ആരാധകരെ ഏറെ അത്ഭുതപ്പെടുത്തിയിരിക്കുന്നത്. കാമുകി അദിതിയാണ് വധു. വര്‍ഷങ്ങളായി താന്‍ പ്രണയത്തിലായിരുന്നുവെന്ന സൂചന പോലും ആരാധകര്‍ക്ക് നല്‍കാതെയാണ് താരത്തിന്റെ പെട്ടെന്നുള്ള വിവാഹം. മോഹിത് റെയ്ന തന്നെയാണ് വിവാഹവാര്‍ത്ത സോഷ്യല്‍ മീഡിയിലൂടെ വെളിപ്പെടുത്തിയത്. വിവാഹദിനത്തിലെ ഇരുവരുടെയും സുന്ദര നിമിഷങ്ങളാണ് താരം പങ്കുവച്ചത്.
‘പ്രണയത്തിന് അതിരുകളില്ല, അത് പ്രതിബന്ധങ്ങളെയും മതില്‍ക്കെട്ടുകളെയും മറികടന്ന് ഏറെ പ്രതീക്ഷയോടെ ലക്ഷ്യസ്ഥാനത്ത് എത്തുന്നു. ആ പ്രതീക്ഷയും മാതാപിതാക്കളുടെ അനുഗ്രഹവും കൊണ്ട്, നാം ഇനി രണ്ടല്ല, ഒന്നാണ്. ഈ പുതിയ യാത്രയില്‍ എല്ലാവരുടെയും സ്‌നേഹവും അനുഗ്രഹവും പ്രതീക്ഷിക്കുന്നു- അദിതിയും മോഹിത്തും’ എന്ന അടിക്കുറിപ്പോടെ ഇന്‍സ്റ്റഗ്രാമിലാണ് താരം ചിത്രങ്ങള്‍ പങ്കുവച്ചത്.
വെള്ള ഷെര്‍വാണിയും അതിന് അനുയോജ്യമായ തലപ്പാവുമാണ് റെയ്നയുടെ വിവാഹവേഷം. അതേസമയം മഞ്ഞ ലെഹങ്കയില്‍ അതിസുന്ദരിയായിരുന്നു അദിതി. ഏതായാലും ആരാധകര്‍ ആഘോഷമാക്കിയ വിവാഹ വാര്‍ത്തയ്ക്ക് പിന്നാലെ ദമ്പതികള്‍ക്ക് ആശംസകള്‍ നേര്‍ന്നുകൊണ്ട് പ്രമുഖ താരങ്ങളുള്‍പ്പടെ നിരവധിപേര്‍ രംഗത്തെത്തിയിട്ടുണ്ട്. നേരത്തേ ‘ദേവോം കെ ദേവ് മഹാദേവി’ല്‍ ഒപ്പം അഭിനയിച്ച നടി മൗനി റോയിയുമായി പ്രണയത്തിലാണെന്ന തരത്തിലുള്ള അഭ്യൂഹങ്ങള്‍ പുറത്തുവന്നിരുന്നു. എന്നാല്‍ ഇരുവരും പ്രതികരിച്ചില്ല. മുംബൈ ഡയറീസ് 26/11, ഷിദ്ദത്ത് എന്നീ ചിത്രങ്ങളിലും മോഹിത് പ്രധാന വേഷങ്ങളിലെത്തിയിരുന്നു.
