കോട്ടയം∙ വൈക്കത്തിനടുത്ത് തലയോലപ്പറമ്പിൽ വാഹനാപകടത്തിൽ യുവാവിന് ദാരുണാന്ത്യം. തലയോലപ്പറമ്പ് പെരുവ റൂട്ടിൽ കീഴൂർ സായിപ്പ് കവലയ്ക്കു സമീപം ബൈക്കും ടിപ്പർ ലോറിയും കൂട്ടിയിടിച്ചാണ് അപകടം. തലയോലപ്പറമ്പ് ഡിബി കോളേജ് വിദ്യാർഥി കാരിക്കോട് ചൂണ്ടക്കാലായിൽ എബിൻ പീറ്റർ (19) ആണ് മരിച്ചത്.
ചൊവ്വാഴ്ച ഉച്ചയ്ക്ക് 12.30 നായിരുന്നു സംഭവം. ബൈക്കും ടിപ്പറും ഒരു ദിശയിൽ നിന്നും വരികയായിരുന്നു. ബൈക്ക് ടിപ്പറിനെ മറികടക്കാൻ ശ്രമിക്കുന്നതിനിടെയാണ് അപകടം. ടിപ്പർ ലോറിയ്ക്കടിയിലേക്കു ബൈക്കുമായി വീണ യുവാവ് തൽക്ഷണം മരിച്ചു. സംഭവത്തിൽ തലയോലപ്പറമ്പ് പൊലീസ് കേസെടുത്തു. ഇയാൾക്കൊപ്പം ബൈക്കിലുണ്ടായിരുന്ന യുവാവിനെ പരുക്കുകളോടെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
