കോട്ടയം∙ ചെയർമാൻ പദവിയുടെ മഹത്വം പാലാ നഗരസഭാ ചെയർമാൻ ഉൾക്കൊള്ളണമെന്നു മാണി സി. കാപ്പൻ എം എൽഎ. പൊതുമരാമത്ത് വകുപ്പിന്റെ കീഴിലുള്ള പാലാ ബൈപാസിന്റെ പൂർത്തീകരണ ജോലികളുടെ ഉദ്ഘാടനം നഗരസഭാ ചെയർമാൻ സ്വന്തമായി നടത്തിയതിനോടു പ്രതികരിക്കുകയായിരുന്നു എംഎൽഎ. ഒട്ടേറെ മഹാരഥന്മാർ ഇരുന്ന കസേരയാണെന്ന ചിന്ത ചെയർമാനുണ്ടാവണം. പൊതുമരാമത്ത് വകുപ്പിന്റെ റോഡിൽ ചെയർമാന് അധികാരമൊന്നുമില്ല. എംഎൽഎയെ ഇകഴ്ത്തി കാണിക്കാൻ ചെയർമാൻ രാഷ്ട്രീയ ലക്ഷ്യത്തോടെയാണ് പ്രവർത്തിക്കുന്നത്.
ചെയർമാന്റെ വില കുറഞ്ഞ രാഷ്ട്രീയം പാലാക്കാർക്കു തന്നെ നാണക്കേടാണ്. 2010 മുതൽ ബൈപാസിന്റെ ഭാഗം പൂർത്തിയാക്കാൻ കഴിയാതെ കിടക്കുകയായിരുന്നു. 2019 ൽ താൻ എംഎൽഎ ആയപ്പോഴാണ് അന്ന് മുഖ്യമന്ത്രിയായിരുന്ന പിണറായി വിജയനെ വിഷയം നേരിൽ ധരിപ്പിച്ചു ആവശ്യമായ പണം അനുവദിപ്പിച്ചത്. തുടർന്നു പരാതിയുണ്ടായിരുന്ന സ്ഥലമുടമകളെ കണ്ട് പ്രശ്ന പരിഹാരം കണ്ടെത്തുകയും ചെയ്തു.
വസ്തുതകൾ ഇതായിരിക്കെ ബൈപാസ് പൂർത്തീകരിക്കാൻ കാലാകാലങ്ങളോളം തടസം നിന്നവർ ജനത്തെ തെറ്റിദ്ധരിപ്പിക്കാൻ രംഗത്തിറങ്ങിയിരിക്കുകയാണെന്നും മാണി സി കാപ്പൻ കുറ്റപ്പെടുത്തി. നഗരസഭാ ചെയർമാൻ നിവേദനം നൽകിയാൽ സർക്കാർ തലത്തിൽ ഉടനടി പ്രശ്ന പരിഹാരമുണ്ടാവുമെങ്കിൽ കളരിയന്മാക്കൽ കടവ് പാലം പൂർത്തീകരണം, സർക്കാർ ആശുപത്രി റോഡ്, അരുണാപുരം ചെക്കുഡാം തുടങ്ങിയവയ്ക്കു കത്ത് കൊടുത്തു പ്രശ്ന പരിഹാരം കാണാൻ ചെയർമാൻ തയാറാകണം. പാലായിലെ മറ്റു പഞ്ചായത്തു പ്രസിഡന്റുമാർക്കുള്ള അധികാരം മാത്രമേ ചെയർമാനും ഉള്ളൂവെന്നു പാലാ ചെയർമാൻ മനസിലാക്കണമെന്നും എംഎൽഎ ഓർമ്മിപ്പിച്ചു.
