മൂവാറ്റുപുഴ/തൊടുപുഴ∙ പഞ്ചായത്ത് അസിസ്റ്റന്റ് എക്സിക്യൂട്ടീവ് എൻജിനീയറെ വീട്ടിൽ തൂങ്ങി മരിച്ച നിലയിൽ കണ്ടെത്തി. അറക്കുളം പഞ്ചായത്ത് അസിസ്റ്റന്റ് എക്സിക്യൂട്ടീവ് എൻജിനീയർ ആവോലി പുറത്തട്ടേൽ പി.ആർ.ബാബുരാജിനെ (51) ആണ് ഇന്നലെ വീടിന്റെ മുകളിലത്തെ മുറിയിൽ മരിച്ച നിലയിൽ കണ്ടെത്തിയത്. ആത്മഹത്യക്കുറിപ്പ് പൊലീസ് കണ്ടെടുത്തു. അറക്കുളം പഞ്ചായത്ത് അംഗത്തിനെതിരെ ആത്മഹത്യാ കുറിപ്പിൽ പരാമർശം ഉണ്ടെന്നു പൊലീസ് പറഞ്ഞു. അസ്വാഭാവിക മരണത്തിനു കേസ് റജിസ്റ്റർ ചെയ്തു. സംസ്കാരം ഇന്ന് 2 ന് മൂവാറ്റുപുഴ നഗരസഭ ശ്മശാനത്തിൽ. ഭാര്യ: മടക്കത്താനം പള്ളിക്കാമഠത്തിൽ മഞ്ജു. മക്കൾ: ഉമ, അദ്വൈത്.
ബാബുരാജിന്റെ ആത്മഹത്യയ്ക്കു പിന്നിൽ ഇടുക്കിയിലെ സിപിഎം നേതാവിന്റെ ഭീഷണി എന്നാണു സൂചന. സിപിഎം ഇടുക്കി ജില്ലാ കമ്മിറ്റിയംഗമായ നേതാവിന്റെ പേരാണ് മരണക്കുറിപ്പിൽ പരാമർശിച്ചിട്ടുള്ളതെന്നു പറയുന്നു. പഞ്ചായത്ത് കമ്മിറ്റി നടക്കുമ്പോൾ അസി.എൻജിനീയറെ കമ്മിറ്റിയിലേക്കു വിളിച്ചുവരുത്തി ഭീഷണിപ്പെടുത്തിയെന്നു മറ്റു ചില അംഗങ്ങളും വെളിപ്പെടുത്തിയിട്ടുണ്ട്. പഞ്ചായത്ത് അംഗത്തിന്റെ വാർഡിലെ കലുങ്ക് നിർമാണത്തിലെ അപാകതയെക്കുറിച്ചു കരാറുകാരനുമായി ഉണ്ടായ പ്രശ്‌നങ്ങളാണു മരണത്തിനു പിന്നിലെന്നും സൂചനയുണ്ട്.
