കൊച്ചി: ആലുവയില്‍ വീടിനുള്ളില്‍ ഗ്യാസ് സിലിണ്ടര്‍ പൊട്ടിത്തെറിച്ചു. കരോതുകുഴിയിലെ അഡ്വ ശംസുവിന്റെ വീട്ടിലാണ് അപകടമുണ്ടായത്. പുതിയ സിലിണ്ടര്‍ പിടിപ്പിക്കുന്നതിനിടെ വ്യാഴാഴ്ച രാവിലെ ആറ് മണിയോടെ തീപിടിക്കുകയും പിന്നാലെ പൊട്ടിത്തെറിക്കുകയുമായിരുന്നു. വീട്ടിലുണ്ടായിരുന്നവര്‍ അത്ഭുതകരമായി രക്ഷപ്പെട്ടു.കഴിഞ്ഞ രണ്ട് വര്‍ഷമായി വീട്ടില്‍ വാടകയ്ക്ക് താമസിച്ചു വന്നിരുന്ന റോബിന്റെ മകളുടെ ജന്മദിനമായിരുന്നു ഇന്ന്. ആഘോഷങ്ങള്‍ക്കുള്ള പാചകത്തിന്റെ തിരക്കിലായിരുന്നു റോബിനും ഭാര്യയും. ഇതിനിടെയാണ് ഗ്യാസ് സിലിണ്ടറിന് തീപിടിച്ചത്. തീ കെടുത്താന്‍ ഒരു ബ്ലാങ്കറ്റ് കൊണ്ട് ഗ്യാസ് സിലിണ്ടര്‍ മൂടാന്‍ ശ്രമിച്ചെങ്കിലും സാധിച്ചില്ല. പിന്നാലെ സിലിണ്ടര്‍ പൊട്ടിത്തെറിച്ചു. അടുക്കളയില്‍ ഉണ്ടായിരുന്ന സാധനങ്ങളെല്ലാം നശിച്ചെങ്കിലും വീട്ടിലുണ്ടായിരുന്നവര്‍ക്ക് പരിക്കൊന്നും സംഭവിച്ചില്ല.
