കോട്ടയം : നിയന്ത്രണം വിട്ട കാർ റോഡരികിലേക്കു തലകീഴായി മറിഞ്ഞ് അപകടം. കാറിലുണ്ടായിരുന്നവർ നിസാര പരിക്കുകളോടെ രക്ഷപെട്ടു. വ്യാഴാഴ്ച വൈകുന്നേരം 3.15ന് എംസി റോഡിൽ പള്ളം പോസ്റ്റ് ഓഫീസ് ജംഗ്ഷനു സമീപമാണ് അപകടം. ചങ്ങനാശേരിയിൽ നിന്ന് കോട്ടയം ഭാഗത്തേക്ക് വരികയായിരുന്ന ഇയോണ് കാറാണ് മറിഞ്ഞത്. കാറിലുണ്ടായിരുന്ന ചങ്ങനാശേരി സ്വദേശികളായ കുളത്തിൽപറമ്പിൽ ഹിദായത്തുദീൻ (40), ജിനു എന്നിവരെ നിസാര പരിക്കുകളോടെ ജില്ലാ ജനറൽ ആശുപത്രിയിൽ പ്രവേശിപ്പിച്ചു. നിയന്ത്രണം വിട്ട കാർ തലകീഴായി റോഡരികിലെ മരങ്ങൾക്കിടയിലേക്ക് മറിയുന്നതു കണ്ട നാട്ടുകാർ ഓടിക്കൂടി കാർ ഉയർത്താൻ ശ്രമിച്ചെങ്കിലും സാധിച്ചില്ല. തുടർന്ന് അഗ്നിശമന സേനയെ വിവരമറിയിക്കുകയായിരുന്നു. കോട്ടയത്തു നിന്നുമെത്തിയ അഗ്നിശമന സേന കാർ ഉയർത്തി ഇരുവരെയും ആംബുലൻസിൽ ആശുപത്രിയിൽ എത്തിക്കുകയായിരുന്നു. ആക്സിലേറ്ററിൽ നിന്നു ബ്രേക്കിലേക്ക് ചവിട്ടുന്നതിനിടെ ചെരുപ്പ് ഉടക്കിയതാണ് കാർ നിയന്ത്രണം വിടാൻ കാരണമെന്നു സ്ഥലത്തെത്തിയ ചിങ്ങവനം പോലീസ് പറഞ്ഞു.
