കൊച്ചി: നടിയെ ആക്രമിച്ച കേസിന്റെ തുടരന്വേഷണത്തിനു കൂടുതൽ സമയം തേടി വീണ്ടും ക്രൈംബ്രാഞ്ച് ഹൈക്കോടതിയിൽ. മൂന്നു മാസം കൂടി സമയം അനുവദിക്കണമെന്നാണ് ആവശ്യം. കോടതി അനുവദിച്ച സമയം ഈ മാസം 31ന് അവസാനിക്കാനിരിക്കെയാണ് പുതിയ ഹർജി. കേസ് അട്ടിമറിക്കുകയാണെന്നു കാണിച്ച് അതിജീവിത കഴിഞ്ഞ ദിവസം ഹൈക്കോടതിയിൽ ഹർജി നൽകിയിരുന്നു. പിന്നാലെ ചില വിവാദങ്ങളും ഉയർന്നുവന്നു. ഈ സാഹചര്യത്തിൽ അന്വേഷണം പൂർത്തിയാക്കാൻ മൂന്നു മാസം കൂടിയെങ്കിലും അനുവദിക്കണം എന്നാണ് ആവശ്യം.
കേസിൽ കൂടുതൽ ഡിജിറ്റൽ തെളിവുകൾ പരിശോധിക്കണം, ഫൊറൻസിക് പരിശോധനാ ഫലങ്ങൾ ലഭിക്കാനുണ്ട്, കൂടുതൽ ആളുകളെ ചോദ്യം ചെയ്യണം തുടങ്ങിയ ആവശ്യങ്ങളാണ് അന്വേഷണ സംഘം മുന്നോട്ടു വച്ചിരിക്കുന്നത്. കഴിഞ്ഞ പ്രാവശ്യം കൂടുതൽ സമയം തേടി ക്രൈംബ്രാഞ്ച് സമർപ്പിച്ച ഹർജി പരിഗണിക്കുമ്പോൾ ഈ മാസം 31നു തന്നെ കർശനമായും കുറ്റപത്രം സമർപ്പിച്ചിരിക്കണം എന്നായിരുന്നു നിർദേശം. ഇനി സമയം നീട്ടി നൽകാനാവില്ലെന്നും കോടതി മുന്നറിയിപ്പു നൽകിയിരുന്നു. ഇതിനിടെ, അഭിഭാഷകരെ ചോദ്യം ചെയ്യുന്നതിൽനിന്ന് അന്വേഷണ സംഘം പിൻമാറിയതോടെയാണ് അതിജീവിത ഹൈക്കോടതിയിലെത്തിയത്. ഈ സാഹചര്യത്തിൽ കോടതിയുടെ തീരുമാനം നിർണായകമാകും എന്നാണ് വിലയിരുത്തൽ.
