അഫ്ഗാനിസ്ഥാനിൽ മൂന്ന് സ്ത്രീകളടക്കം പന്ത്രണ്ട് പേരെ പരസ്യമായി ചാട്ടവാറിനടിച്ച് താലിബാൻ. അഫ്ഗാനിസ്ഥാനിലെ ഫുട്ബോൾ സ്റ്റേഡിയത്തിൽ ആയിരക്കണക്കിന് ആളുകൾ നോക്കി നിൽക്കെയാണ് താലിബാൻ ഇവരുടെ ശിക്ഷ നടപ്പിലാക്കിയത്.
വ്യഭിചാരം, കവർച്ച, സ്വവർഗ്ഗ ലൈംഗികത എന്നിവ അടക്കമുള്ള ‘ധാർമ്മിക കുറ്റകൃത്യങ്ങൾ’ ചെയ്തതായി ആരോപിച്ചാണ് പന്ത്രണ്ട് പേരെയും പരസ്യമായി ചാട്ടവാറിനടിച്ചത്. ബിബിസി -യുടെ റിപ്പോർട്ട് പ്രകാരം ഈ മാസം തന്നെ ഇത് രണ്ടാമത്തെ തവണയാണ് താലിബാൻ അഫ്ഗാനിസ്ഥാനിൽ പരസ്യമായ ശിക്ഷ നടപ്പിലാക്കുന്നത്. ഇതോടെ 1990 -കളിലെ ഭരണകാലത്തിലേക്ക് തന്നെ താലിബാൻ തിരികെ പോവുകയാണ് എന്ന ആശങ്ക വീണ്ടും ജനങ്ങളിൽ അടിയുറക്കുകയാണ്.
മൂന്ന് സ്ത്രീകളെയും ശിക്ഷിച്ച ശേഷം മോചിപ്പിച്ചു എന്നും ചില പുരുഷന്മാരെ ജയിലിൽ അടച്ചു എന്നും അഫ്ഗാനിസ്ഥാനിലെ ലോഗർ മേഖലയിലെ താലിബാൻ വക്താവ് ഒമർ മൻസൂർ മുജാഹിദ് പറഞ്ഞു. എന്നാൽ, എത്ര പുരുഷന്മാരെയാണ് ജയിലിൽ അടച്ചിരിക്കുന്നത് എന്നത് വ്യക്തമാക്കിയിട്ടില്ല. ഇരുപത്തിയൊന്നിനും മുപ്പത്തിയൊമ്പതിനും ഇടയിൽ അടിയാണ് ഓരോ സ്ത്രീക്കും പുരുഷനും നൽകിയത്. 39 അടിയായിരുന്നു ഏറ്റവും കൂടുതൽ എന്നും താലിബാൻ വ്യക്തമാക്കി.
കഴിഞ്ഞയാഴ്ച സമാനമായ സംഭവം വടക്കൻ അഫ്ഗാനിസ്ഥാനിലെ തഖർ പ്രവിശ്യയിലും നടന്നിരുന്നു. അന്ന് അവിടെ 19 പേരെ ചാട്ടവാറിനടിച്ച് ശിക്ഷിച്ചതായി റിപ്പോർട്ടുകൾ പുറത്ത് വന്നിരുന്നു. താലിബാന്റെ പരമോന്നത നേതാവായ ഹിബത്തുള്ള അഖുന്ദ്‌സാദ, ചില കുറ്റങ്ങൾക്ക് ശരിയ നിയമങ്ങൾക്കനുസൃതമായി കർശനമായ ശിക്ഷ നടപ്പിലാക്കണം എന്ന് പറഞ്ഞതിന് ഒരാഴ്ചയ്ക്ക് ശേഷമാണ് ലോഗർ പ്രവിശ്യയിൽ ചാട്ടവാറിനടിച്ച് ആളുകളെ ശിക്ഷിച്ചത് എന്നതും ശ്രദ്ധേയമാണ്.
പരസ്യ വധശിക്ഷകൾ, അംഗച്ഛേദം, കല്ലെറിയൽ എന്നിവയെല്ലാം ഈ ശിക്ഷകളിൽ പെടുന്നു. എന്നിരുന്നാലും ഏതെല്ലാം കുറ്റകൃത്യങ്ങൾക്ക് എങ്ങനെയെല്ലാമാണ് ശിക്ഷ എന്നത് ഇതുവരെ താലിബാൻ പറഞ്ഞിട്ടില്ല. 1996 മുതൽ 2001 വരെയുള്ള ഭരണകാലത്ത് ഇത്തരം ശിക്ഷകളും കർശനമായ ഭരണരീതികളുമാണ് താലിബാൻ മുന്നോട്ട് വച്ചിരുന്നത്. എന്നാൽ, ഇത്തവണ ഭരണത്തിൽ വരുമ്പോൾ അത് ആവർത്തിക്കില്ല എന്നാണ് താലിബാൻ പറഞ്ഞിരുന്നത്. പക്ഷേ, ആ ഭരണകാലത്തേക്ക് തന്നെ മടങ്ങിപ്പോവുന്ന തരത്തിലാണ് താലിബാൻ കുറച്ച് കാലങ്ങളായി പ്രവർത്തിക്കുന്നത് എന്നത് ജനങ്ങളുടെ ആശങ്ക വീണ്ടും വർധിപ്പിച്ചിട്ടുണ്ട്.
