ന്യൂഡൽഹി∙ 800 പുതിയ ലീപ് (ലീഡിങ് എഡ്ജ് ഏവിയേഷൻ പ്രോപൽഷൻ) എൻജിനുകൾ വാങ്ങാൻ ടാറ്റയുടെ ഉടമസ്ഥതയിലുള്ള എയർ ഇന്ത്യ സിഎഫ്എം ഇന്റർനാഷനലുമായി കരാറിൽ ഏർപ്പെട്ടു. പുതിയതായി വാങ്ങുന്ന 400 വിമാനങ്ങളിലേക്കാണിത്. 210 എയർബേസ് എ320 /എ321 നിയോ വിമാനങ്ങളിലും 190 ബോയിങ് 737 മാക്സ് വിമാനങ്ങളിലേക്കുമാണ് ലീപ് എൻജിൻ എത്തുന്നത്.
എ320 നിയോ വിമാനങ്ങൾ പ്രവർത്തിപ്പിക്കാൻ തുടങ്ങിയ 2002 മുതൽ, എയർ ഇന്ത്യ സിഎഫ്എമ്മിന്റെ ഉപഭോക്താക്കളാണ്. 2017ൽ എയർ ഇന്ത്യയുടെ എ320 നിയോ വിമാനങ്ങളിലാണ് ഇന്ത്യയിൽ ആദ്യമായി ലീപ് –1എ എൻജീനുകൾ ഉപയോഗിക്കുന്നത്. നിലവിൽ ലീപ് –1എ എൻജിനുകളിൽ പ്രവർത്തിക്കുന്ന 27 എ320 നിയോ എയർക്രാഫ്റ്റുകളാണുള്ളത്. സിഎഫ്എമ്മുമായുള്ള പുതിയ കരാർ വലിയ മുന്നേറ്റത്തിലേക്കു കമ്പനിയെ നയിക്കുമെന്നാണ് പ്രതീക്ഷിക്കുന്നതെന്ന് എയർ ഇന്ത്യ സിഇഒ ക്യംപ്ബെൽ വിൽസൻ അറിയിച്ചു.
