തിരുവനന്തപുരം: വന്ദേഭാരതില് അഭിമാനിക്കാന് എന്തിരിക്കുന്നുവെന്ന വിമര്ശനവുമായി സിപിഐഎം കേന്ദ്രകമ്മിറ്റി അംഗം എകെ ബാലന്. സംസ്ഥാനത്ത് വന്ദേഭാരത് എന്ന ഒരു പുതിയ ട്രെയിന് വന്നത് നല്ല കാര്യമാണ്. കേരളത്തോട് റെയില്വേ കാണിച്ചിട്ടുള്ള അവഹേളനത്തിനും അപമാനത്തിനും ഇതൊരു പരിഹാരമാണോ എന്നും അദ്ദേഹം ചോദിച്ചു. ‘റെയില്വേയുടെ കാര്യത്തില് കേരളത്തോടുള്ള അവഗണനയില് കോണ്ഗ്രസും ബിജെപിയും ഒരേ സമീപനം തന്നെയാണ് കാട്ടിയത്. ഫേസ്ബുക്ക് പോസ്റ്റിലൂടെയായിരുന്നു അദ്ദേഹത്തിന്റെ പ്രതികരണം.
കെ റെയില് ഒരു പുതിയ പദ്ധതിയാണ്. കെ റെയിലില് തിരുവനന്തപുരത്തു നിന്ന് കണ്ണൂരെത്താന് മൂന്നു മണിക്കൂര് മതി. ടിക്കറ്റ് ചാര്ജ് 1325 രൂപ മാത്രം. വന്ദേ ഭാരത് തിരുവനന്തപുരത്തു നിന്ന് കണ്ണൂരെത്താന് എട്ടു മണിക്കൂറാണ് എടുക്കുന്നത്. ടിക്കറ്റ് ചാര്ജ് 2238 രൂപ. തിരുവനന്തപുരം – കണ്ണൂര് വിമാനക്കൂലി 2897 രൂപയാണ്. കേവലം ഒരു മണിക്കൂര് കൊണ്ട് എത്തും. വന്ദേ ഭാരത് ചാര്ജും വിമാന കൂലിയും തമ്മില് വലിയൊരു വ്യത്യാസം ഇല്ല. ഒരു ട്രെയിന് കൂടി കിട്ടി എന്നത് നല്ല കാര്യം. പക്ഷേ റെയില്വേ വികസന കാര്യത്തില് കേരളത്തോട് കാട്ടിയ അവഗണനയ്ക്കും അപമാനത്തിനും ഇത് ഒരിക്കലും പരിഹാരമാവുന്നില്ലെന്ന് എ കെ ബാലന് പറഞ്ഞു.
