സംഗീത ഇതിഹാസം എ.ആർ.റഹ്മാൻ വീണ്ടും മലയാളത്തിലേയ്ക്കെത്തുന്നു. ഫഹദ് ഫാസിലിനെ നായകനാക്കി ഫാസിൽ നിർമിക്കുന്ന ‘മലയൻ കുഞ്ഞി’നു വേണ്ടി പശ്ചാത്തലസംഗീതമൊരുക്കാനാണ് റഹ്മാൻ എത്തുന്നത്. നവാഗതനായ സജിമോൻ സംവിധാനം ചെയ്യുന്ന ചിത്രമാണിത്. മഹേഷ് നാരായണനാണു ചിത്രത്തിന്റെ തിരക്കഥ ഒരുക്കിയിരിക്കുന്നത്. ഇന്ത്യൻ സിനിമാ – സംഗീതരംഗത്തെ നിറസാന്നിധ്യമായ എ.ആർ.റഹ്മാൻ, ചുരുക്കം ചില ചിത്രങ്ങളിലൂടെ മാത്രമാണ് മലയാളത്തിൽ സാന്നിധ്യമറിയിച്ചത്.
1992ൽ പുറത്തിറങ്ങിയ ‘യോദ്ധ’ എന്ന മോഹൻലാൽ ചിത്രത്തിനു വേണ്ടി സംഗീതമൊരുക്കിയത് എ.ആർ.റഹ്മാൻ ആണ്. ചിത്രത്തിലെ പാട്ടുകളെല്ലാം ഏറെ ശ്രദ്ധിക്കപ്പെടുകയും ചെയ്തു. വർഷങ്ങൾക്കിപ്പുറം ബ്ലെസിയുടെ സംവിധാനത്തിലൊരുങ്ങിയ ‘ആടുജീവിതം’ എന്ന പൃഥ്വിരാജ് ചിത്രത്തിനു വേണ്ടിയും റഹ്മാൻ ഈണമൊരുക്കി. ഇപ്പോഴിതാ ‘മലയൻകുഞ്ഞി’ലൂടെയും അദ്ദേഹത്തിന്റെ സംഗീതം പ്രേക്ഷകർക്കരികിലെത്തുന്നു. പ്രിയ സംഗീതജ്ഞന്റെ ഈണങ്ങൾ കേൾക്കാൻ കാത്തിരിക്കുകയാണ് ആരാധകർ.
