ദോഹ ∙ ഒരിക്കൽക്കൂടി പെനൽറ്റിയും അതിൽനിന്ന് ലയണൽ മെസ്സിയുടെ ഗോളും രക്ഷയ്ക്കെത്തിയ മത്സരത്തിൽ, കലാശപ്പോരാട്ടത്തിന്റെ ആദ്യപകുതിയിൽ ലീഡെടുത്ത് അർജന്റീന. 23–ാം മിനിറ്റിലാണ് ലയണൽ മെസ്സി പെനൽറ്റിയിൽനിന്ന് അർജന്റീനയ്ക്കായി ലക്ഷ്യം കണ്ടത്. വലതുവിങ്ങിൽ അപകടകരമായ നീക്കങ്ങൾ നടത്തിയ എയ്ഞ്ചൽ ഡി മരിയയെ സ്വന്തം ബോക്സിനുള്ളിൽ ഫ്രഞ്ച് താരം ഒസ്മാൻ ഡെംബലെ വീഴ്ത്തിയതിനായിരുന്നു അർജന്റീനയ്ക്ക് പെനൽറ്റി ലഭിച്ചത്.
കിക്കെടുത്ത മെസ്സി അനായാസം ലക്ഷ്യം കണ്ടു. ഖത്തർ ലോകകപ്പിൽ അഞ്ചാം പെനൽറ്റിയിൽനിന്ന് മെസ്സിയുടെ നാലാം ഗോളാണിത്. കാൽ നൂറ്റാണ്ടിനിടെ മൂന്നാം കിരീടമാണ് ഫ്രാൻസ് ലക്ഷ്യമിടുന്നത്. 2018നു മുൻപ് 1998ൽ സ്വന്തം നാട്ടിൽ നടന്ന ചാംപ്യൻഷിപ്പിലും ജേതാക്കളായി. മൂന്നാം കിരീടമാണ് അർജന്റീനയുടെയും ലക്ഷ്യം. ഇതിനു മുൻപുള്ള കിരീടങ്ങൾ 1978ൽ സ്വന്തം നാട്ടിലും 1986ൽ മെക്സിക്കോയിലും. ഖത്തർ ലോകകപ്പ് വിജയികൾക്ക് സമ്മാന തുകയായി ലഭിക്കുക 347 കോടി രൂപയാണ്. രണ്ടാം സ്ഥാനക്കാർക്ക് 248 കോടി രൂപയും ലഭിക്കും
ലോകകപ്പ് ഫൈനലിനു മുൻപ് പ്രചരിച്ച സകല അഭ്യൂഹങ്ങൾക്കും വിടനൽകി സമ്പൂർണ ടീമിനെയാണ് നിർണായക മത്സരത്തിൽ ഇരു ടീമുകളും കളത്തിലിറക്കുന്നത്. പനി മൂലം മൊറോക്കോയ്‌ക്കെതിരായ സെമി പോരാട്ടത്തിൽ കളത്തിലിറങ്ങാതിരുന്ന അഡ്രിയാൻ റാബിയോ, ഉപമെകാനോ തുടങ്ങിയവരെല്ലാം ഫ്രാൻസിന്റെ ആദ്യ ഇലവനിൽ ഇടംപിടിച്ചു. സെമിയിൽ കളിച്ച ടീമിൽനിന്ന് യൂസഫ് ഫൊഫാന, ഇബ്രാഹിമ കൊനാട്ടെ എന്നിവർ പകരക്കാരുടെ ബെഞ്ചിലേക്കു മാറി. കായികക്ഷമതയുടെ കാര്യത്തിൽ സംശയങ്ങൾ ഉയർന്ന ഒളിവർ ജിറൂദും റാഫേൽ വരാനും ഉൾപ്പെടെയുള്ളവർ ഫ്രഞ്ച് നിരയിലുണ്ട്. ഗ്രൂപ്പ് ഘട്ടത്തിനുശേഷം ഇതാദ്യമായി അർജന്റീനയുടെ ആദ്യ ഇലവനിലേക്ക് എയ്ഞ്ചർ ഡി മരിയ തിരിച്ചെത്തി. സസ്പെൻഷനു ശേഷം തിരിച്ചെത്തിയ മാർക്കോസ് അക്യൂനയ്ക്കു പകരം ടഗ്ലിയാഫിക്കോയെ പരിശീലകൻ ലയണൽ സ്കലോനി നിലനിർത്തിയത് ശ്രദ്ധേയം.
