ദിസ്‌പുർ> പശുവിനെ മോഷ്ടിച്ചെന്ന് ആരോപിച്ച് അസമിൽ മുസ്ലിം യുവാവിനെ അടിച്ചുകൊന്നു. സംഭവവുമായി ബന്ധപ്പെട്ട്‌ ആറു പേരെ അറസ്റ്റ് ചെയ്‌തതായി പൊലീസ്‌ അധികൃതർ അറിയിച്ചു. ബാമുൻഗാവ്‌ സ്വദേശി ഹിഫ്‌സുൽ റഹ്‌മാനാ (40)ണ്‌ കൊല്ലപ്പെട്ടത്‌. ഹോജോയ്‌ ജില്ലയിൽ ലങ്ക പൊലീസ്‌ സ്‌റ്റേഷൻ പരിധിയിലായിരുന്നു സംഭവം. സംഘപരിവാര്‍ ബന്ധമുള്ള ഗോരക്ഷാ ഗുണ്ടകള്‍ മേഖലയില്‍ സജീവമാണ്.
അക്രമത്തിലേർപ്പെട്ട കൂടുതൽ പേരെ തിരിച്ചറിഞ്ഞിട്ടുണ്ടെന്നും ഇവർ ഉടൻ പിടിയിലാകുമെന്നും പൊലീസ്‌ അറിയിച്ചു. ഹിഫ്‌സുൽ റഹ്‌മാന്റെ കുടുംബാംഗങ്ങൾ നൽകിയ പരാതിയുടെ അടിസ്ഥാനത്തിലാണ്‌ പൊലീസ്‌ കേസെടുത്തത്‌. അക്രമവിവരം അറിഞ്ഞ്‌ സ്ഥലത്തെത്തിയപ്പോൾ യുവാവ് അബോധാവസ്ഥയിലായിരുന്നെന്ന്‌ പൊലീസ്‌ ഉദ്യോഗസ്ഥർ പറഞ്ഞു. ഉടൻതന്നെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.
