കോഴിക്കോട്‌: കെഎസ്‌ആർടിസി ബസ്സിലെ യാത്രയ്ക്കിടെ ഗവേഷണ വിദ്യാർഥിക്കുനേരെയുണ്ടായ അതിക്രമം ഒരു തരത്തിലും ന്യായീകരിക്കാനാകില്ലെന്ന്‌ വനിതാ കമീഷൻ അധ്യക്ഷ പി സതീദേവി പറഞ്ഞു. കെഎസ്‌ആർടിസി ജീവനക്കാർ ഉത്തരവാദിത്വം കാട്ടിയില്ലെങ്കിൽ അവർക്കെതിരെ നടപടിയെടുക്കണം. അന്തസ്സോടെ യാത്രചെയ്യാനുള്ള സാഹചര്യം ഉറപ്പുവരുത്തണമെന്ന ധാരണ ആ ബസ്സിലെ ജീവനക്കാർക്കും ഒപ്പമുള്ള യാത്രക്കാർക്കുമുണ്ടായില്ല എന്നത്‌ ഖേദകരമാണ്‌.
സ്‌ത്രീകളുടെ സുരക്ഷ ഓരോരുത്തരുടെയും ഉത്തരവാദിത്വമാണെന്ന തിരിച്ചറിവ്‌ പൊതു സമൂഹത്തിന്‌ ഉണ്ടായാലേ സാമൂഹ്യ പ്രതിബദ്ധതയുള്ള നാടാണ്‌ കേരളമെന്ന്‌ പറയാനാകൂ. വീടുകളിലും തൊഴിലിടങ്ങളിലും എല്ലാ അവകാശവുമുള്ള സഹജീവിയായി സ്ത്രീകളെ പരിഗണിക്കുന്നതിനുള്ള മനോഭാവം സമൂഹത്തിനുണ്ടാകണമെന്നും കോഴിക്കോട്ട്‌ മാധ്യമപ്രവർത്തകരോട്‌ അവർ പറഞ്ഞു
