അബുദാബി : ഡ്യൂട്ടി ഫ്രീ ബിഗ് ടിക്കറ്റ് പുതുവർഷ ബമ്പർ നറുക്ക് മുഴുവനും സ്വന്തമാക്കി ഇന്ത്യക്കാർ. ബിഗ് ടിക്കറ്റ് ചരിത്രത്തിലെ വലിയ സമ്മാനമായ 25 ദശലക്ഷം ദിർഹത്തിന് (ഏകദേശം 50 കോടി രൂപ) മലപ്പുറം സ്വദേശി ഹരിദാസൻ മൂത്തട്ടിൽ വാസുണ്ണി അർഹനായി. അൽ ഐനിൽ താമസിക്കുന്ന 35 വയസ്സുള്ള ഇദ്ദേഹത്തിന് സ്റ്റോറിൽനിന്ന് നേരിട്ടെടുത്ത 232976 നമ്പർ ടിക്കറ്റിലൂടെയാണ് ഭാഗ്യസമ്മാനം ലഭിച്ചത്. സമ്മാനം ലഭിച്ച വിവരം അറിയിക്കാൻ വിളിച്ച ബിഗ് ടിക്കറ്റ് പ്രതിനിധികളോട് ‘ അവിശ്വസനീയം’ എന്നായിരുന്നു ഹരിദാസന്റെ പ്രതികരണം. ബാക്കിയുള്ള അഞ്ചുവിജയികളും ഓൺലൈനായാണ് ടിക്കറ്റ് വാങ്ങിയത്.
രണ്ടാംസമ്മാനമായ 20 ലക്ഷം ദിർഹത്തിന് (നാലുകോടി രൂപ) അശ്വിൻ അരവിന്ദാക്ഷൻ അർഹനായി. 390843 നമ്പർ ടിക്കറ്റിലൂടെയാണ് ഭാഗ്യം ലഭിച്ചത്. മൂന്നാം നറുക്കായ ഒരു ലക്ഷം ദിർഹത്തിന് ദീപക് രാമചന്ദ് ഭാട്ടിയ അർഹനായി. നാലും അഞ്ചും ആറും സ്ഥാനങ്ങൾ യഥാക്രമം തേജസ് ഹാൽബി, ദിനേഷ് ഹാർലി, സുനിൽ കുമാർ ശശിധരൻ എന്നിവർ അർഹരായി. ബിഗ്ടിക്കറ്റ് വെബ്സൈറ്റിൽ പ്രസിദ്ധീകരിച്ച പ്രതിവാര നറുക്കെടുപ്പിലും ആഡംബരവാഹന നറുക്കെടുപ്പിലും സമീപകാലത്ത് സമ്മാനങ്ങൾ ലഭിച്ചവരെല്ലാം ഇന്ത്യക്കാരാണെന്നതും ശ്രദ്ധേയമാണ്.
