ന്യൂഡൽഹി : ബിജെപിയുടെ പാർട്ടി ഫണ്ടിലേക്ക് 1000 രൂപ സംഭാവന നൽകി പ്രധാനമന്ത്രി നരേന്ദ്ര മോദി. ചെറിയ സംഭാവനകൾ നൽകി ബിജെപിയെയും രാജ്യത്തെയും ശക്തിപ്പെടുത്താൻ സഹായിക്കണമെന്നും പ്രധാനമന്ത്രി ആഹ്വാനം ചെയ്തു. പണം നൽകിയതിനു കൈപ്പറ്റിയ രസീത് അദ്ദേഹം ട്വിറ്ററിൽ പങ്കുവെച്ചു. ബിജെപിയുടെ പാർട്ടി ഫണ്ടിലേക്ക് ഞാൻ 1000 രൂപ സംഭാവന ചെയ്തു. രാജ്യത്തിന്റെ താൽപര്യങ്ങൾക്കാണു നമ്മുടെ പ്രഥമ പരിഗണന. ഒപ്പം ജീവിതാവസാനം വരെ സ്വാർഥതയില്ലാതെ സേവനം ചെയ്യുന്ന നമ്മുടെ കേഡർമാരെ ചെറിയ തുകകൾ സംഭാവന ചെയ്തു ശക്തരാക്കണം. ബിജെപിയെ ശക്തരാക്കാൻ സഹായിക്കുക , ഇന്ത്യയെ ശക്തമാക്കാൻ സഹായിക്കുക – മോദി ട്വീറ്റ് ചെയ്തു. ബിജെപി ദേശീയ അധ്യക്ഷൻ ജെ.പി.നഡ്ഡയും 1000 രൂപ സംഭാവന ചെയ്തു. മുൻ പ്രധാനമന്ത്രി അടൽ ബിഹാരി വാജ്പേയിയുടെ ജന്മ വർഷത്തോടനുബന്ധിച്ചാണു സംഭാവനാ ക്യാംപെയ്ൻ ബിജെപി ആരംഭിച്ചത്. 5 രൂപ മുതൽ 1000 രൂപ വരെ സംഭാവന നൽകാനാകുമെന്നു നഡ്ഡ അറിയിച്ചു. 2022 ഫെബ്രുവരി 22 വരെ ക്യാംപെയ്ൻ തുടരും.
