വഡോദര > ഗുജറാത്തിലെ വഡോദരയിൽ വിദ്യാർഥികളുമായി പോയ ബോട്ട് മറിഞ്ഞ് 6 വിദ്യാർഥികൾ മരിച്ചു. നിരവധി വിദ്യാർഥികളെ കാണാതായി. വഡോദരയിലെ ഹർണി തടാകത്തിലാണ് അപകടം. സംഭവം നടക്കുമ്പോൾ 27 വിദ്യാർഥികളും 4 അധ്യാപകരുമാണ് ബോട്ടിലുണ്ടായിരുന്നത്. സ്വകാര്യ സ്കൂളിൽ നിന്നും വിനോദയാത്രയ്ക്ക് പോയ സംഘമാണ് അപകടത്തിൽപെട്ടത്. സംഭവസമയത്ത് ആരും ലൈഫ് ജാക്കറ്റ് ഉപയോഗിച്ചിരുന്നില്ലെന്നാണ് വിവരം. രക്ഷാപ്രവർത്തനം പുരോഗമിക്കുകയാണ്.
