ടൊവിനോ തോമസിനെ നായകനാക്കി ബേസില്‍ ജോസഫ് സംവിധാനം ചെയ്ത് നെറ്റ്ഫ്‌ലിക്സിലൂടെ റിലീസ് ചെയ്ത മലയാളത്തിലെ ആദ്യ സൂപ്പര്‍ ഹീറോ ചിത്രം മിന്നല്‍ മുരളിക്ക് മികച്ച പ്രതികരണങ്ങളാണ് ലഭിച്ചുകൊണ്ടിരിക്കുന്നത്. ബേസില്‍ ജോസഫിന്റെ മൂന്നാംചിത്രമായ മിന്നല്‍ മുരളി പാന്‍ ഇന്ത്യന്‍ തലത്തില്‍ നിരൂപക പ്രശംസ നേടി മുന്നേറുകയാണ്. ഹിന്ദി ഉള്‍പ്പടെയുള്ള അഞ്ച് ഭാഷകളില്‍ റിലീസ് ചെയ്തതുകൊണ്ടുതന്നെ ചിത്രത്തിലെ അഭിനേതാക്കളെ ബോളിവുഡ് അടക്കം ശ്രദ്ധിക്കുകയാണ്. സൂപ്പര്‍ ഹീറോ വേഷം ടൊവിനോ തോമസിന് വളരെയേറെ പ്രശംസ നേടിക്കൊടുത്തിരിക്കുകയാണ്. ഇതിനിടെ ഹിന്ദി ഉള്‍പ്പടെയുള്ള മറ്റ് ഭാഷകളിലെ സിനിമ വ്യവസായങ്ങളുടെ ഭാഗമാകുന്നതില്‍ നിലപാട് വ്യക്തമാക്കിയിരിക്കുകയാണ് നടന്‍.ഒരുപാട് അഭിനേതാക്കള്‍, സാങ്കേതിക വിദഗ്ധര്‍, ചലച്ചിത്ര പ്രവര്‍ത്തകര്‍ എന്നിവരാല്‍ അനുഗ്രഹീതമാണ് ബോളിവുഡ്.
എന്നാല്‍ ഒരു ബോളിവുഡ് സിനിമ ചെയ്യാന്‍ വേണ്ടി മാത്രമായി അത് ചെയ്യണമെന്ന് ആഗ്രഹിക്കുന്നയാളല്ല താന്‍, ഒരു കഥാപാത്രം തന്നെ ആവശ്യപ്പെടുന്നുണ്ടെങ്കില്‍ മാത്രം ബോളിവുഡ് സിനിമ ചെയ്യുമെന്നും ടൊവിനോ പറയുന്നു. ആമിര്‍ ഖാന്‍, കരീന കപൂര്‍ എന്നിവര്‍ അഭിനയിച്ച ലാല്‍ സിങ് ഛദ്ദയില്‍ ടൊവിനോ തോമസിന് മുന്‍പ് അവസരം ലഭിച്ചിരുന്നു. എന്നാല്‍ മിന്നല്‍ മുരളിയുടെ ഷൂട്ടിങ്ങിന് ഇടയിലായിരുന്നതിനാല്‍ അന്ന് അരങ്ങേറ്റം കുറിക്കാന്‍ സാധിക്കാതെ പോകുകയായിരുന്നു. ഒടുവില്‍ നാഗ ചൈതന്യയാണ് ടൊവിനോ തോമസിന്റെ വേഷം അവതരിപ്പിച്ചത്. മലയാളത്തിന് പുറമേ തമിഴില്‍ ധനുഷ് നായകനായ മാരി 2 എന്ന ചിത്രത്തില്‍ ടൊവിനോ അഭിനയിച്ചിട്ടുണ്ട്.
