ന്യൂഡല്ഹി : യുപിയിലും പഞ്ചാബിലും പരമ്പരാഗത ശക്തികേന്ദ്രങ്ങളില് നിലനില്പ്പിന്റെ പോരാട്ടത്തിലാണ് ബിഎസ്പി. തിരഞ്ഞെടുപ്പുമായി ബന്ധപ്പെട്ട് ഫെബ്രുവരി 8ന് ബിഎസ്പി അധ്യക്ഷ മായാവതി പഞ്ചാബ് സന്ദര്ശിക്കാന് ഒരുങ്ങുകയാണ്. നവന്ഷഹറില് നടക്കുന്ന പൊതുയോഗത്തില് മായാവതി പങ്കെടുക്കുമെന്ന് ബിഎസ്പി പഞ്ചാബ് അധ്യക്ഷന് ജസ്വീര് ഗാര്ഹി പറഞ്ഞു. തിരഞ്ഞെടുപ്പില് ശിരോമണി അകാലിദള് (എസ്എഡി)-ബിഎസ്പി സഖ്യം വ്യക്തമായ ഭൂരിപക്ഷം നേടുമെന്നും അദ്ദേഹം അവകാശപ്പെട്ടു. പഞ്ചാബില് 20 മണ്ഡലങ്ങളില് ബിഎസ്പി മത്സരിക്കാനൊരുങ്ങുന്നത് കോണ്ഗ്രസിനെ ആശങ്കയിലാക്കുന്നു. കോണ്ഗ്രസ് ഭരണം അവസാനിക്കാനായി പഞ്ചാബിലെ ജനങ്ങള് ആകാംക്ഷയോടെ കാത്തിരിക്കുകയാണ്. കോണ്ഗ്രസ് നേതാക്കള് തമ്മിലുള്ള ഭിന്നതയില് ജനക്ഷേമം നിഷേധിക്കപ്പെട്ടതായും ജസ്വീര് ഗാര്ഹി പറഞ്ഞു.
അതേസമയം, യുപിയില് എസ്പി-ആര്എല്എഡി സഖ്യവും ഭീം ആര്മി പോലുള്ള സംഘടനകളും ബിഎസ്പിക്ക് വെല്ലുവിളി ഉയര്ത്തുകയാണ്. കഴിഞ്ഞ തിരഞ്ഞെടുപ്പില് രണ്ട് സീറ്റുകള് മാത്രമേ പശ്ചിമ യുപിയില്നിന്ന് ബിഎസ്പിക്ക് നേടാനായുള്ളൂ. ആദ്യ രണ്ട് ഘട്ടങ്ങളില് വോട്ടെടുപ്പ് നടക്കുന്ന 111 മണ്ഡലങ്ങളില് 41ലും ബിഎസ്പിക്കായിരുന്നു രണ്ടാം സ്ഥാനം. മത്സരം പ്രധാനമായും ബിജെപിയും ബിഎസ്പിയും തമ്മിലായിരുന്നു. ഇത്തവണ പശ്ചിമ യുപിയിലെ പോരാട്ടം ബിജെപിയും എസ്പി-ആര്എല്ഡി സഖ്യവും തമ്മിലാണെന്ന പ്രതീതിയാണുള്ളത്. പ്രചാരണ രംഗത്തെ ബിഎസ്പിയുടെ നിര്ജീവതയും മായാവതിയുടെ അസാന്നിധ്യവുമൊക്കെ ഇതിന്റെ കാരണമാണ്. ദലിത് വോട്ടുകള് നിര്ണായകമായ സഹാറന്പുര് പോലുള്ള ജില്ലകളില് ബിഎസ്പിയേക്കാള് സജീവമായി പ്രചരണ രംഗത്തുള്ളത് ഭീം ആര്മിയാണ്. മേഖലയിലെ ഭൂരിഭാഗം മണ്ഡലങ്ങളിലും ഭീം ആര്മിയുടെ ആസാദ് സമാജ് പാര്ട്ടി മത്സരിക്കുന്നുണ്ട്.