ദില്ലി : കേന്ദ്ര ബജറ്റിനെതിരെ വിമർശനവുമായി പ്രതിപക്ഷം. ധനമന്ത്രിയും പ്രധാനമന്ത്രിയും രാജ്യത്തെ സാധാരണക്കാരെ വഞ്ചിച്ചെന്ന് കോൺഗ്രസ് ആരോപിച്ചു. വിലക്കയറ്റവും കൊവിഡ് സമയത്ത് ശമ്പളം വെട്ടിക്കുറച്ചതും കാരണം ഇടത്തരക്കാർ ബുദ്ധിമുട്ടുകയാണെന്ന് കോൺഗ്രസ് ജനറൽ സെക്രട്ടറിയും മുഖ്യ വക്താവുമായ രൺദീപ് സുർജേവാല പറഞ്ഞു.
ഇന്ത്യയിലെ സാധാരണക്കാർ കൊവിഡ് വരുത്തിയ മാന്ദ്യത്തിൽ നിന്ന് ആശ്വാസം പ്രതീക്ഷിച്ചിരുന്നു. എന്നാൽ ധനമന്ത്രിയും പ്രധാനമന്ത്രിയും വീണ്ടും അവരെ നിരാശപ്പെടുത്തി. ഇത് രാജ്യത്തെ ശമ്പളക്കാരോടും ഇടത്തരക്കാരോടുമുള്ള വഞ്ചനയാണ് – സുർജേവാല ട്വിറ്ററിൽ കുറിച്ചു. 2022-23 ലെ കേന്ദ്ര ബജറ്റ് ധനമന്ത്രി പാർലമെന്റിൽ അവതരിപ്പിച്ചതിന് തൊട്ടുപിന്നാലെയാണ് വിമർശനം.
