ആലപ്പുഴ > ക്ഷേത്ര പൂജാദി കര്മ്മങ്ങളില് നിന്നും ഉപദേശക സമിതി പൂജാരിയെ മാറ്റി നിര്ത്തിയതായി പരാതി. പൂജാരിയായ മനു ആനന്ദാണ് ഈഴവ സമുദായത്തില്പ്പെട്ടതിനാൽ വിവേചനം നേരിട്ടതായി ദേവസ്വം വകുപ്പിന് പരാതി നല്കിയത്. ജാതി വ്യവസ്ഥയുടെ പേരിലാണ് തന്നെ മാറ്റിനിര്ത്തിയതായാണ് മനു പരാതിയില് പറയുന്നത്.
ആലപ്പുഴ എടത്വ പച്ച ചെക്കരിക്കാവ് ദേവീക്ഷേത്രത്തിലെ പൂജാരിയാണ് മനു ആനന്ദ്. ദേവസ്വം വകുപ്പ് മന്ത്രിക്കാണ് പരാതി നല്കിയത്. ക്ഷേത്രം ഭാരവാഹികളാണ് ഈഴവ സമുദായത്തില്പ്പെട്ട പൂജാരിയെ മാറ്റി പകരം പൂജാരിയെക്കൊണ്ട് കര്മ്മങ്ങള് ചെയ്യിച്ചത്. ക്ഷേത്ര വിശ്വാസികള് നോക്കി നില്ക്കുന്ന സമയത്താണ് തന്നെ മാറ്റി മറ്റൊരാളെ പൂജ ചെയ്യാന് നിയോഗിച്ചതെന്ന് മനു പരാതിയിൽ പറയുന്നു.
2012 മുതല് ദേവസ്വം ബോര്ഡിന്റെ കീഴിലുള്ള ക്ഷേത്രങ്ങളില് കര്മ്മങ്ങള് ചെയ്തുവരുന്ന പൂജാരിയാണ് മനു. ആയില്യം പൂജയുമായി ബന്ധപ്പെട്ട് തിരക്ക് കൂടിയതുകൊണ്ടാണ് മറ്റൊരു പൂജാരിയെ നിയോഗിച്ചതെന്നാണ് ക്ഷേത്രം ഉപദേശക സമിതിയുടെ വിശദീകരണം. ഇതിന് മുമ്പ് ചെട്ടികുളങ്ങര ക്ഷേത്രത്തിലും ഈഴവ സമുദായത്തില്പ്പെട്ട പൂജാരിയെ പൂജ ചെയ്യാന് അനുവദിച്ചിരുന്നില്ല. ആര്എസ്എസിന്റെ നിയന്ത്രണത്തിലുള്ള ക്ഷേത്രങ്ങളിലാണ് ഇത്തരത്തില് ജാതീയ വ്യവസ്ഥ ഇപ്പോഴും നിലനില്ക്കുന്നത് എന്നാണ് പൂജാരിയുടെ പരാതി.
