കൊല്ലം : കോവിഡ് ബാധിച്ച് മറ്റുസംസ്ഥാനങ്ങളില്െവച്ചു മരിച്ചവരുടെ അടുത്ത ബന്ധുക്കള്ക്കും കേരള സര്ക്കാര് കോവിഡ് ധനസഹായം നല്കും. കോവിഡ് പോസിറ്റീവ് സര്ട്ടിഫിക്കറ്റിന്റെയും മരണ സര്ട്ടിഫിക്കറ്റിന്റെയും അടിസ്ഥാനത്തിലാണ് തുക അനുവദിക്കുന്നത്. മറ്റുസംസ്ഥാനങ്ങളില് ഈ തുകയ്ക്കായി അപേക്ഷ സമര്പ്പിക്കുകയോ കൈപ്പറ്റുകയോ ചെയ്തിട്ടില്ലെന്ന സാക്ഷ്യപത്രവും ഹാജരാക്കണം. ദുരന്തനിവാരണവകുപ്പ് ഇതുസംബന്ധിച്ച് ഉത്തരവ് പുറപ്പെടുവിച്ചു. കാസര്കോട് കളക്ടറുടെ കത്തിനെത്തുടര്ന്നാണ് നടപടി. കോവിഡ് ബാധിച്ചു മരിച്ചവരുടെ അടുത്ത ബന്ധുവിന് സംസ്ഥാന ദുരന്തപ്രതികരണനിധിയില്നിന്ന് 50,000 രൂപയാണ് എക്സ്ഗ്രേഷ്യ ധനസഹായം അനുവദിക്കുക. ഇതിനായി കോവിഡ് മരണസ്ഥിരീകരണ സര്ട്ടിഫിക്കറ്റ് ഹാജരാക്കണമെന്നാണ് വ്യവസ്ഥ.
2021 ഒക്ടോബര് 13 വരെയുള്ള കാലയളവില് കാസര്കോട് ജില്ലക്കാരായ 50 പേര് കര്ണാടകത്തിലെ മംഗലാപുരത്തെ ആശുപത്രികളില് മരിച്ചതായി കളക്ടര് സര്ക്കാരിനെ അറിയിച്ചിരുന്നു. ഇവരുടെ ബന്ധുക്കളുടെ പക്കല് കോവിഡ് പോസിറ്റീവ് സര്ട്ടിഫിക്കറ്റും മരണ സര്ട്ടിഫിക്കറ്റും മാത്രമാണുള്ളത്. കര്ണാടകത്തില്നിന്ന് കോവിഡ് മരണസ്ഥിരീകരണ സര്ട്ടിഫിക്കറ്റ് ലഭിക്കുന്നതിനു പ്രയാസം നേരിടുന്നതായും കളക്ടര് ചൂണ്ടിക്കാട്ടിയിരുന്നു.
കേന്ദ്ര ആരോഗ്യമന്ത്രാലയം പുറപ്പെടുവിച്ച മാര്ഗനിര്ദേശങ്ങളില് കോവിഡ് ബാധ സ്ഥിരീകരിച്ച് ഒരുമാസത്തിനകം സംഭവിക്കുന്ന മരണം, ആശുപത്രിക്കുപുറത്തു െവച്ചായാലും കോവിഡ് മരണമായി കണക്കാക്കാവുന്നതാണെന്നു പറഞ്ഞിട്ടുണ്ട്. ഇതിന്റെ അടിസ്ഥാനത്തിലാണ് കോവിഡ് മരണസ്ഥിരീകരണ സര്ട്ടിഫിക്കറ്റില്ലെങ്കിലും ധനസഹായം നല്കാമെന്ന സര്ക്കാര് ഉത്തരവ്.
