കണ്ണൂർ: ബിജെപിയുടെ വളർച്ച തടയുന്നതിന് ഇടതുപക്ഷ ജനാധിപത്യ മുന്നണിയുടെ രൂപീകരണത്തിനുള്ള ശ്രമങ്ങള്‍ക്കു പാര്‍ട്ടി മുന്‍ഗണന നല്‍കണമെന്ന് സിപിഎമ്മിന്റെ കരട് രാഷ്ട്രീയ പ്രമേയം. പ്രമേയം ജനറൽ സെക്രട്ടറി സീതാറാം യച്ചൂരി സമ്മേളനത്തിൽ അവതരിപ്പിക്കും. ഇടതുപക്ഷ ജനാധിപത്യ മുന്നണിയുടെ രൂപീകരണത്തിനായി പാർട്ടിക്കു യോജിക്കാൻ കഴിയുന്ന സംഘടനകളുടെ പൊതുവേദിയുടെ രൂപീകരണം സംബന്ധിച്ചു മുൻപും ചർച്ച നടന്നെങ്കിലും പ്രതീക്ഷിച്ച മുന്നേറ്റമുണ്ടായില്ലെന്നു രാഷ്ട്രീയ പ്രമേയത്തിൽ ചൂണ്ടിക്കാട്ടുന്നു. ഫലപ്രദമായ സംയുക്ത വേദികള്‍ രൂപപ്പെടുത്താനുള്ള ശ്രമങ്ങള്‍ തുടരണം.
രാജ്യത്തു മുഖ്യരാഷ്ട്രീയ പാര്‍ട്ടിയായി ബിജെപി ഉയര്‍ന്നു. അതിവേഗം പടര്‍ന്നുപിടിക്കുന്ന ആര്‍എസ്എസ് ശൃംഖലയുടെ അടിത്തറയില്‍ ബിജെപിയുടെ സ്വാധീനം രാജ്യത്തിന്‍റെ എല്ലാ ഭാഗങ്ങളിലും എത്തുന്നു. അധികാരം നിലനിർത്താൻ സിബിഐ, ഇഡി, മറ്റു കേന്ദ്ര ഏജന്‍സികള്‍ എന്നിവയെ ഉപയോഗിച്ചു സർക്കാരുകളെ ഭീഷണിപ്പെടുത്തുന്നു.
അതേസമയം, കോണ്‍ഗ്രസിന്‍റെ രാഷ്ട്രീയ സ്വാധീനവും സംഘടനാ ശക്തിയും ക്ഷയിച്ചു കൊണ്ടിരിക്കുകയാണെന്നും പ്രമേയത്തിൽ പറയുന്നു. പല സംസ്ഥാനങ്ങളിലെയും നിരവധി നേതാക്കള്‍ ബിജെപിയിലേക്കു കൂറുമാറുന്നതിന്‍റെ ഫലമായി കോൺഗ്രസ് തുടര്‍ച്ചയായ പ്രതിസന്ധികളില്‍ മുങ്ങിയിരിക്കുകയാണ്. മതനിരപേക്ഷമാണെന്നു പ്രഖ്യാപിക്കുന്നുണ്ടെങ്കിലും ഹിന്ദുത്വ കക്ഷികള്‍ക്ക് ആശയപരമായ വെല്ലുവിളി ഉയര്‍ത്താന്‍ കോൺഗ്രസിനു കഴിയുന്നില്ല. പലപ്പോഴും അനുരഞ്ജന സമീപനമാണു സ്വീകരിക്കുന്നത്. ദുര്‍ബലമായ കോണ്‍ഗ്രസിന് എല്ലാ മതനിരപേക്ഷ പ്രതിപക്ഷ പാര്‍ട്ടികളെയും അണിനിരത്താന്‍ കഴിയുന്നില്ല.
രാഷ്ട്രീയവും പ്രത്യയശാസ്ത്രപരവും സംഘടനാപരവുമായ പ്രവര്‍ത്തനങ്ങളെ അടിയന്തരമായി ശക്തിപ്പെടുത്തിയില്ലെങ്കിൽ ത്രിപുരയിലെയും ബംഗാളിലെയും തകർച്ചയിൽനിന്ന് മടങ്ങിവരാനാകില്ല. ജനങ്ങളെ ബാധിക്കുന്ന പ്രശ്നങ്ങളില്‍ പ്രാദേശിക സമരങ്ങള്‍ ശക്തിപ്പെടുത്തുന്നതില്‍ ഊന്നല്‍ നല്‍കണം. അത്തരം പ്രക്ഷോഭങ്ങള്‍ കാട്ടിക്കൂട്ടലാകരുത്. ന്യൂനപക്ഷ സമുദായങ്ങളുടെ സംരക്ഷണം ഏറ്റെടുത്തു നടപ്പിലാക്കണം. ഗുണനിലവാരമുള്ള അംഗങ്ങള്‍ വഴി സംഘടനയെ ശക്തിപ്പെടുത്തണം. യുവാക്കളെയും സ്ത്രീകളെയും പാര്‍ട്ടിയിലേക്ക് ആകര്‍ഷിക്കുന്നതില്‍ ശ്രദ്ധ ചെലുത്തണമെന്നും കരടു രാഷ്ട്രീയ പ്രമേയത്തിൽ പറയുന്നു.
