കൊച്ചി∙ ഇറച്ചിവെട്ട് യന്ത്രത്തില്‍നിന്ന് സ്വര്‍ണം പിടിച്ച കേസിൽ തൃക്കാക്കര നഗരസഭാ വൈസ് ചെയര്‍മാന്റെ വീട്ടില്‍ കസ്റ്റംസ് പരിശോധന നടത്തുന്നു. വൈസ് ചെയര്‍മാന്‍ കെ.കെ.ഇബ്രാഹിംകുട്ടിയുടെ വീട്ടിലാണ് റെയ്ഡ്. ശനിയാഴ്ച രാത്രിയാണ് നെടുമ്പാശേരി വിമാനത്താവളം വഴി ഇറച്ചിവെട്ട് യന്ത്രത്തിനുള്ളില്‍ ഒളിപ്പിച്ച് കടത്താന്‍ ശ്രമിച്ച സ്വര്‍ണം കസ്റ്റംസ് പിടികൂടിയത്. ദുബായില്‍നിന്ന് കാര്‍ഗോ വിമാനത്തിലാണ് രണ്ടേകാൽ കിലോ സ്വർണം എത്തിയത്. കൃത്യമായ വിവരം ലഭിച്ചതിനെ തുടർന്ന് കസ്റ്റംസ് ഇന്റലിജൻസ് യന്ത്രം തകർത്ത് സ്വർണം കണ്ടെത്തുകയായിരുന്നു.
പാർസൽ ഏറ്റെടുക്കാൻ വാഹനവുമായി എത്തിയ തൃക്കാക്കര സ്വദേശി നകുലിനെ അന്നുതന്നെ കസ്റ്റഡിയിൽ എടുത്തിരുന്നു. തൃക്കാക്കര തുരുത്തേല്‍ എന്റര്‍പ്രൈസസിന്റെ പേരിലെത്തിയ ഇറച്ചിവെട്ട് യന്ത്രമാണ് പാഴ്സലിലുണ്ടായിരുന്നത്. ഏറെ പണിപ്പെട്ടിട്ടും തുറക്കാന്‍ സാധിക്കാതിരുന്നതോടെ യന്ത്രം കട്ടര്‍ ഉപയോഗിച്ച് മുറിച്ചു. തുടർന്നു രണ്ടേകാൽ കിലോയോളം വരുന്ന ചെറുതും വലുതുമായ നാല് സ്വര്‍ണക്കട്ടികള്‍ കണ്ടെടുക്കുകയായിരുന്നു. ഇവയ്ക്ക് ഒരു കോടി രൂപയ്ക്കു മുകളില്‍ വിലവരും. സിറാജുദ്ദിനെന്ന വ്യക്തിയാണ് ദുബായില്‍നിന്ന‍ു സ്വര്‍ണം അയച്ചതെന്നാണ് വിവരം.
