കണ്ണൂര്‍: പയ്യന്നൂരിലെ അച്ചടക്ക നടപടിയില്‍ വിശദീകരണവുമായി സിപിഎം ജില്ലാ സെക്രട്ടേറിയറ്റ്. തിരിമറിയില്‍ പാര്‍ട്ടിയുടെ ഫണ്ട് നഷ്ടമായിട്ടില്ലെന്നാണ് വിശദീകരണം. യഥാസമയം ഓഡിറ്റ് നടത്താത്തതും ജാഗ്രതക്കുറവും വീഴ്ചയെന്ന് ജില്ലാ സെക്രട്ടേറിയറ്റ് വിലയിരുത്തി. പാര്‍ട്ടിയിലെ മാനസിക ഐക്യത്തിനായാണ് പയ്യന്നൂര്‍ ഏരിയാ സെക്രട്ടറിയെ മാറ്റിയതെന്നും ഇത് അച്ചടക്ക നടപടിയല്ലെന്നും സെക്രട്ടേറിയറ്റ് വിശദീകരിക്കുന്നു.
സിപിഎം പയ്യന്നൂർ ഏരിയ കമ്മിറ്റിയിലെ ഒരു കോടിയോളം രൂപയുടെ ഫണ്ട് തിരിമറി വിവാദത്തിൽ ടി.ഐ.മധുസൂദനൻ എംഎൽഎയോടൊപ്പം ഏരിയ സെക്രട്ടറി വി.കുഞ്ഞിക്കൃഷ്ണനെതിരെയും പാർട്ടി നടപടിയെടുക്കുകയായിരുന്നു. കണക്കുകളും രേഖകളും സഹിതം തിരിമറി പാർട്ടിയുടെ ശ്രദ്ധയിൽ കൊണ്ടുവന്നയാളാണ് കുഞ്ഞിക്കൃഷ്ണൻ. ഇയാളെ ഏരിയ സെക്രട്ടറി സ്ഥാനത്തുനിന്ന് മാറ്റുകയായിരുന്നു. മധുസൂദനനെ ജില്ലാ സെക്രട്ടേറിയറ്റിൽ നിന്നു ജില്ലാ കമ്മിറ്റിയിലേക്കു തരംതാഴ്ത്തുകയും ചെയ്തു.
