ബെംഗളൂരു: സൗജന്യ വൈദ്യുതി കോണ്ഗ്രസ് വാഗ്ദാനം ചെയ്തതിനാല് ജൂണ് 1 മുതല് ബില്ലുകള് അടയ്ക്കരുതെന്ന് കര്ണാടക ബിജെപി എംപി. കര്ണാടകയില് അധികാരത്തിലെത്തിയാല് എല്ലാ വീട്ടിലും സൗജന്യ വൈദ്യുതി നല്കുമെന്ന കോണ്ഗ്രസിന്റെ വാഗ്ദാനത്തെ ഉദ്ധരിച്ചാണ് മൈസൂരു എംപിയും ബിജെപി നേതാവുമായ പ്രതാപ് സിംഹ ജനങ്ങളോട് ജൂണ് 1 മുതല് വൈദ്യുതി ബില്ലുകള് അടയ്ക്കരുതെന്ന് ആവശ്യപ്പെട്ടത്. എല്ലാ വീടുകളിലും 200 യൂണിറ്റ് സൗജന്യ വൈദ്യുതിയാണ് കോണ്ഗ്രസ് തിരഞ്ഞെടുപ്പ് പ്രകടന പത്രികയില് വാഗ്ദാനം ചെയ്തത്.
കര്ണാടകയില് 135 സീറ്റുകള് നേടി കോണ്ഗ്രസ് ബിജെപിയെ അധികാരത്തില് നിന്നും പുറത്താക്കുകയും സിദ്ധരാമയ്യ മുഖ്യമന്ത്രിയായി സത്യപ്രതിജ്ഞ ചെയ്യുകയും ചെയ്തപ്പോള്, പാര്ട്ടിയുടെ എല്ലാ ഉറപ്പുകളും ഉടന് നടപ്പാക്കുമെന്ന് വാഗ്ദാനം ചെയ്തിരുന്നു. ഇപ്പോള് ഉപാധികളുമില്ലാതെ വാഗ്ദാനങ്ങള് നടപ്പാക്കാന് പുതിയ സര്ക്കാരിന് ജൂണ് 1 വരെ സമയം നല്കിയിരിക്കുകയാണ് ബിജെപി. അടുത്ത മാസത്തിനകം സൗജന്യ വൈദ്യുതി പദ്ധതി നടപ്പാക്കിയില്ലെങ്കില് പ്രതിഷേധവുമായി ബി.ജെ.പി തെരുവിലിറങ്ങും.