യൂറോപ്പ് : യൂറോപ്പിൽ കൊടും ചൂടിൽ നട്ടംതിരിഞ്ഞ് ജനം. ബ്രിട്ടനിൽ ചരിത്രത്തിൽ ആദ്യമായി താപനില 40 ഡിഗ്രി സെൽഷ്യസ് കടന്നു. ജർമനിയിൽ ഈ വർഷത്തെ ഏറ്റവും ചൂടേറിയ ദിനമായിരുന്നു ഇന്നലെ. പോർച്ചുഗലിലും സ്പെയിനിലുമായി ഉഷ്ണതരംഗത്തിൽ മരിച്ചവരുടെ എണ്ണം ആയിരം കവിഞ്ഞെന്നാണ് റിപ്പോർട്ട്. ഈ മാസം 12 ന് ശേഷം മാത്രം ഫ്രാൻസിൽ അമ്പതിനായിരത്തോളം ഏക്കർ ഭൂമിയാണ് കത്തി നശിച്ചത്.
വരാനിരിക്കുന്ന ദിവസങ്ങളിലും ഉഷ്ണം കടുക്കുമെന്നാണ് യുഎൻ നൽകുന്ന മുന്നറിയിപ്പ്. കൊടും ചൂട് കാരണം വിമാനത്താവളങ്ങളുടെ പ്രവർത്തനത്തെ ഉൾപ്പെടെ ബാധിച്ചു. കാലാവസ്ഥാ വ്യതിയാനം കാരണം ഉഷ്ണതരംഗങ്ങൾ കൂടുതൽ കൂടുതൽ തീവ്രമായും നിലനിൽക്കുകയും ചെയ്യുമെന്നും യു എന്നിന്റെ കീഴിലുള്ള അന്താരാഷ്ട്ര കാലാവസ്ഥ ഏജൻസി മുന്നറിയിപ്പ് നൽകുന്നുണ്ട്.
ഇറ്റലിയും സ്ഥിതി ഇതിന് സമാനമാണ്. ഇവിടെ താപനില 40 ഡിഗ്രി സെൽഷ്യസ് ആയി ഉയർന്നു. ഇവിടെ അഞ്ച് പ്രധാന നഗരങ്ങളിൽ വരൾച്ചാ മുന്നറിയിപ്പ് നൽകിയിട്ടുണ്ട്. ഫ്രാൻസിൽ റെയിൽ പാളങ്ങൾ നിയന്ത്രണാതീതമായി ചൂടാകുന്നത് വെല്ലുവിളിയാകുന്നുണ്ട്.
