ന്യൂഡൽഹി: കർഷകരുടെ ദില്ലി ചലോ മാർച്ചിനുനേരെയുണ്ടായ ഹരിയാന പൊലീസ് നടപടിയിൽ തലക്ക് പരിക്കേറ്റ യുവകർഷകൻ മരിച്ചു. കണ്ണീർവാതക ഷെല്ല് കൊണ്ട് തലക്ക് പരിക്കേറ്റാണ് കനൗരിയിൽ സമരം ചെയ്യുകയായിരുന്ന പഞ്ചാബിൽനിന്നുള്ള ശുഭ് കരൺ സിങ് (23) ബുധനാഴ്ച ആശുപത്രിയിൽ മരിച്ചത്.
ഇതോടെ ബുധനാഴ്ച പുനരാരംഭിച്ച സമരം വൈകീട്ടോടെ രണ്ടു ദിവസത്തേക്ക് വീണ്ടും നിർത്തിവെച്ചു. പൊലീസ് നടപടിയിൽ നിരവധി കർഷകർക്ക് പരിക്കേറ്റിട്ടുണ്ട്. പൊലീസ് നടപടിയിൽ ഗുരുതരമായി പരിക്കേറ്റ ശുഭ് കരൺ പട്യാലയയിലെ ഗവ. രജീന്ദ്ര ആശുപത്രിയിൽ ചികിത്സക്കിടെയാണ് മരിച്ചതെന്ന് അഖിലേന്ത്യ കിസാൻ സഭ നേതൃത്വം അറിയിച്ചു. ബത്തിണ്ട സ്വദേശിയാണ്.മൃതദേഹം രജീന്ദ്ര ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. അതേസമയം, കണ്ണീർവാതക പ്രയോഗത്തിൽ ആരും മരിച്ചിട്ടില്ലെന്നും പ്രചരിക്കുന്നത് കിംവദന്തിയാണെന്നും ഹരിയാന പൊലീസ് എക്സിൽ കുറിച്ചു. ബുധനാഴ്ചയുണ്ടായ സംഘർഷത്തിൽ 12 പൊലീസുകാർക്ക് സാരമായി പരിക്കേറ്റതായി ജിന്ദ് പൊലീസ് സൂപ്രണ്ട് അറിയിച്ചു.
ഹൃദയാഘാതം മൂലം സമരത്തിലുള്ള രണ്ട് കർഷകർ കഴിഞ്ഞ ദിവസങ്ങളിലായി മരിച്ചിരുന്നു. ബുധനാഴ്ച രാവിലെ 11 മണിക്ക് സമരം പുനരാരംഭിച്ചതിനു പിന്നാലെ പഞ്ചാബ്-ഹരിയാന അതിര്ത്തിയായ ശംഭുവിലും കനൗരിയിലും പൊലീസും കർഷകരും തമ്മിൽ സംഘർഷം രൂക്ഷമായിരുന്നു. സമരക്കാർ ഡൽഹിയിലേക്ക് പോകാൻ ശ്രമിച്ചതോടെ ഹരിയാന പൊലീസ് കണ്ണീര്വാതക ഷെല്ലും റബര് ബുള്ളറ്റുകളും പ്രയോഗിച്ചു.
