കൊൽക്കത്ത : വെസ്റ്റിൻഡീസിനെതിരായ രണ്ടാം ട്വന്റി 20 വിജയിച്ച് പരമ്പര സ്വന്തമാക്കിയെങ്കിലും ടീമിന്റെ മോശം ഫീൽഡിങ്ങിന്റെ കാര്യത്തിൽ നിരാശ പങ്കുവെച്ച് ക്യാപ്റ്റൻ രോഹിത് ശർമ. ആവേശം അവസാന ഓവർ വരെ നീണ്ട മത്സരത്തിൽ എട്ടു റൺസിനായിരുന്നു ഇന്ത്യയുടെ ജയം. മത്സരത്തിൽ വിൻഡീസിനായി തകർപ്പൻ പ്രകടനം പുറത്തെടുത്ത നിക്കോളാസ് പുരന്റെയും റോവ്മാൻ പവലിന്റെയും ക്യാച്ചുകൾ നിർണായക സമയത്ത് ഇന്ത്യൻ താരങ്ങൾ കൈവിട്ടിരുന്നു. ആ ക്യാച്ചുൾ ഫീൽഡർമാർ എടുത്തിരുന്നുവെങ്കിൽ മത്സരം പോലും മറ്റൊന്നായാനേ എന്ന് രോഹിത് മത്സര ശേഷം അഭിപ്രായപ്പെട്ടു. മത്സരത്തിൽ 41 പന്തിൽ 62 റൺസെടുത്ത പുരൻ, 10-ാം ഓവറിൽ വ്യക്തിഗത സ്കോർ 21-ൽ നിൽക്കേ നൽകിയ ക്യാച്ച് രവി ബിഷ്ണോയ് നിലത്തിട്ടിരുന്നു. പിന്നാലെ പവൽ നൽകിയ ക്യാച്ച് സ്വന്തം ബൗളിങ്ങിൽ ഭുവനേശ്വർ കുമാറും കൈവിട്ടു.
അതേസമയം മത്സരത്തിൽ ഇന്ത്യയ്ക്കായി മികച്ച പ്രകടനം പുറത്തെടുത്ത വിരാട് കോലി, ഋഷഭ് പന്ത്, വെങ്കടേഷ് അയ്യർ, ഭുവനേശ്വർ കുമാർ എന്നിവരെ അഭിനന്ദിക്കാനും രോഹിത് മറന്നില്ല.
