നീലേശ്വരം : കരാറുകാരന്റെ വീട്ടുപറമ്പിൽനിന്ന് അഞ്ച് ബാരൽ ടാർ മോഷ്ടിച്ചയാളെ നീലേശ്വരം എസ്.ഐ. ഇ. ജയചന്ദ്രനും സംഘവും പിടികൂടി. ചിറപ്പുറം ആലിങ്കീലിലെ പ്രകാശനെയാണ് (46) കാഞ്ഞങ്ങാട് ഡിവൈ. എസ്.പി. ഡോ. വി. ബാലകൃഷ്ണന്റെ മേൽനോട്ടത്തിൽ നടത്തിയ അന്വേഷണത്തിൽ എസ്.ഐ.യും സംഘവും അറസ്റ്റുചെയ്തത്. രണ്ടുദിവസം മുൻപാണ് പള്ളിക്കരയിലെ അഭിശങ്കറിന്റെ വീട്ടുപറമ്പിൽനിന്ന് ടാർബാരലുകൾ മോഷണം പോയത്. ഒരുബാരലിന് 10,000 രൂപ വിലവരും. പരാതിയെത്തുടർന്ന് പോലീസ് നടത്തിയ അന്വേഷണത്തിലാണ് പ്രകാശനെ പിടികൂടിയത്. മോഷ്ടിച്ച ടാർബാരലുകൾ ആദ്യം ആലിങ്കീഴിലെ ആളൊഴിഞ്ഞ പറമ്പിൽ സൂക്ഷിച്ചുവെച്ചശേഷം മറിച്ചുവില്പന നടത്തുകയായിരുന്നു. ടാർ വാങ്ങിയ ആളെ കുറിച്ചും കടത്തിക്കൊണ്ടുപോകാൻ ഉപയോഗിച്ച വാഹനത്തെക്കുറിച്ചും പോലീസീന് സൂചന ലഭിച്ചിട്ടുണ്ട്. ഒട്ടേറെ മോഷണക്കേസുകളിൽ പ്രതിയാണ് പ്രകാശൻ.
