ചെറായി : കൊലക്കേസ് പ്രതികൾ ഉൾപ്പെട്ട അഞ്ചംഗ ഗുണ്ടാസംഘം ബാർ ഹോട്ടലിലെ മനേജരെ കൈയേറ്റം ചെയ്ത് ബാറിനകത്ത് ഭീകരാന്തരീക്ഷം സൃഷ്ടിച്ചു. സൗജന്യമായി ഭക്ഷണവും മദ്യവും നൽകാത്തതിനെ തുടർന്നായിരുന്നു ആക്രമം. ക്രിസ്മസിന് തലേന്ന് വൈകുന്നേരം ചെറായി ഹോളിഡേ ഹോട്ടലിലാണ് സംഭവം. മാനേജരുടെ പക്കൽനിന്ന് ഫോണും പണമടങ്ങിയ പഴ്സും കത്തികാട്ടി ഭീഷണിപ്പെടുത്തി ഗുണ്ടകൾ കൈവശപ്പെടുത്തുകയും ചെയ്തു. വിവരമറിഞ്ഞ് മുനമ്പം സി.ഐ എ.എൽ. യേശുദാസ്, എസ്.ഐ കെ.എസ്. ശ്യാംകുമാർ എന്നിവരുടെ നേതൃത്വത്തിൽ പോലീസെത്തി അഞ്ചുപേരെയും അറസ്റ്റ് ചെയ്തു.
പോലീസ് ഇവരിൽ നിന്ന് മരാകായുധങ്ങളും കഞ്ചാവ് നിറച്ച സിഗരറ്റുകളും പിടിച്ചെടുത്തു. അയ്യമ്പിള്ളി ആലിങ്കൽ വിവേക് (25), നായരമ്പലം കൈപ്പോൻ അമ്പാടി (20), എടവനക്കാട് വാച്ചാക്കൽ പാലക്കൽ ജിത്തൂസ് (20), ചെറായി പഴേടത്ത് അർജുൻ (21), ചെറായി തോട്ടുങ്കൽ ആദിത്യൻ (21) എന്നിവരാണ് അറസ്റ്റിലായത്. ആദ്യ മൂന്ന് പ്രതികളും ഒരു വർഷം മുമ്പ് പള്ളത്താംകുളങ്ങര ബീച്ചിൽ നടന്ന പ്രണവ് വധക്കേസിലെ പ്രതികളാണെന്ന് പോലീസ് അറിയിച്ചു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. ഹോട്ടലിന് 50,000 രൂപയുടെ നഷ്ടം സംഭവിച്ചതായി പരാതിയിൽ പറയുന്നു.
