തിരുവനന്തപുരം: ‘നല്ല ഭക്ഷണം നാടിന്റെ അവകാശം’ എന്ന ക്യാംപെയ്ന്റെ ഭാഗമായി ഞായറാഴ്ച ഭക്ഷ്യസുരക്ഷാ വകുപ്പ് 572 സ്ഥാപനങ്ങളിൽ പരിശോധന നടത്തിയതായി ആരോഗ്യമന്ത്രി വീണാ ജോര്ജ്. ലൈസന്സോ റജിസ്ട്രേഷനോ ഇല്ലാത്ത 10 കടകള്ക്കെതിരെ നടപടി സ്വീകരിച്ചു. 65 സ്ഥാപനങ്ങള്ക്ക് നോട്ടിസ് നല്കി. 18 കിലോഗ്രാം വൃത്തിഹീനമായ മാംസം പിടിച്ചെടുത്ത് നശിപ്പിച്ചു. നാല് സാംപിളുകള് പരിശോധനയ്ക്കയച്ചു.
ഈ മാസം 2 മുതല് ഇന്നുവരെ കഴിഞ്ഞ ഏഴു ദിവസങ്ങളിലായി സംസ്ഥാന വ്യാപകമായി 1704 പരിശോധനകളാണ് നടത്തിയത്. ലൈസന്സോ റജിസ്ട്രേഷനോ ഇല്ലാത്ത 152 കടകള്ക്കെതിരെ നടപടി സ്വീകരിച്ചു. 531 സ്ഥാപനങ്ങള്ക്ക് നോട്ടിസ് നല്കി. 180 കിലോഗ്രാം വൃത്തിഹീനമായ മാംസം പിടിച്ചെടുത്ത് നശിപ്പിച്ചു. 129 സാംപിളുകള് പരിശോധനയ്ക്കയച്ചു.
ഓപ്പറേഷന് മത്സ്യയുടെ ഭാഗമായി ഇതുവരെ 6069 കിലോഗ്രാം പഴകിയതും രാസവസ്തുക്കള് കലര്ന്നതുമായ മീൻ നശിപ്പിച്ചു. ഈ കാലയളവിലെ 4026 പരിശോധനകളില് 2048 സാംപിളുകള് ശേഖരിച്ച് പരിശോധനയ്ക്കായി അയച്ചു. ശര്ക്കരയില് മായം കണ്ടെത്താനായി ആവിഷ്ക്കരിച്ച ഓപ്പറേഷന് ജാഗറിയുടെ ഭാഗമായി 481 സ്ഥാപനങ്ങള് പരിശോധിച്ചു. വിദഗ്ധ ലബോറട്ടറി പരിശോധനയ്ക്കായി ശര്ക്കരയുടെ 134 സര്വയലന്സ് സാംപിള് ശേഖരിച്ചു. പരിശോധനകള് ശക്തമായി തുടരുമെന്ന് മന്ത്രി പറഞ്ഞു.
